دخلت الصيدلية بعد العصر زي كل يوم في المعاد
بتاعي المعتاد .. "امل"و "حنان" اللي كانو قاعدين هناك مصدقوا
شافوني .. اصل كده خلاص حيروحوا .. شكلهم كانوا تعبوا النهاردة ما شاء الله
بيقولوا جه ناس كتير على غير العاده .. بعدي على طول دخل "عمرو" ..
بيقلوله هنا دكتور "عمرو" .. ابن عمي وصاحبي وصاحب الصيدلية كلها
.. هوه صيدلي انا باشتغل معاه في الصيدلية لغاية ملاقي شغل .. انا خريج علوم
.. دخل عمرو وهوه شايل كتب وورق كتير
كالعاده معرفش بيعمل بيها ايه ولا مره فكرت ابص عليها .. وبعد مدخل البنات مشيت وفضلنا سوا انا وهوه ..
كان يوم طبيعي جدا .. كان لسه بالي رايق مكنتش عارف ان دماغي مش حتوقف تفكير بعد
كده ..
واحنا بنشتغل دخل راجل الصيدلية كان عايز
ابره وعايز حد يدهاله .. عمرو كان مشغول مع واحد فقالي اديله الابره يا
"ياسين" .. الراجل ده كان عامل وشم لفت نظري قوي على دراعه .. كان مكتوب في الوشم
"تجربة 3" .. كانت مكتوبه بطريقة صعب تتفهم من اول وهله ركزت فيه شوية
لغاية مفهمت مكتوب ايه.. ابتسمت وقتها وشاورتله على الوشم سألته اشمعنى 3؟ .. بص
لي بصه حاده قوي ورد عليا "عشان واحد واتنين اتقتلو خلاص" .. استغربت
طريقته في الكلام وكلامه اساسا .. حسيت انه مش مظبوط قلت بلاش ازود معاه في الكلام
.. اديته الابره و عمرو قال لي انه حيحاسبه .. والراجل حاسب ومشى .. وعدى بقيت
اليوم عادي مكنش فيه اي حاجة غريبة ..
خلصت شغلي وركبت مواصله وروحت البيت .. لقيت "ياسمين" بنت اختي "يسرا" جاتلي جري بالفستان
بتاعها الجديد تورهولي وهيه مبسوطه .. وكانت زعلانه على السنه اللي وقعت منها
وقلتلها حتتبدل وحاولت اخليها متزعلش .. وسألتها "باباكي راجع امتى من السفر
عشان تحلوا عننا شوية" كنت بحاول ارخم عليها .. طلعت ماما و يسرا اختي
سامعنني .. ويسرا ردت وقالتلي "معلش يا ياسين حأفضل انا و ياسمين قاعدين على
قلبكم شويه" .. ضحكت وقتها وقلتلها "ده انا انا بهزر معاها .. بعدين ده
بيت باباكي يا يسرا اقعدي فيه براحتك طبعا ده انتم نورتوا البيت بالبنوته العسل
دي" واديت بوسه لياسمين وسلمت على امي ودخلت ارتاح ..
بعدها بيوم رحت الصيدلية كالعادة .. امل
وحنان كانوا بردك هناك .. اول مدخلت لقيت في صوت عالي بره الصيدلية .. دوشه جامده
وزي ميكون في حاجة ملمومين عليها .. طلعت تاني اشوف في ايه وسبت البنات في
الصيدلية .. عرفت ان في واحد رمى نفسه من البلكونه وملمومين حواليه .. بيقولوا اسمه
"ماهر" .. انا بصيت من بعيد عليه كان منظر مش حلو .. بس لفت نظري دراعه
.. كان عليه نفس الوشم .. "تجربة 3" .. ومكتوب بنفس الطريقة الغريبة ..
وقتها افتكرت كلامه .. قال لي ان واحد واتنين
ماتوا .. او اتقتلوا.. حسيت ان في حاجة غلط .. بعدها رجعت الصيدلية .. شوية عمرو
جه والبنات مشيوا .. وقتها حكيت لعمرو كل حاجة ..
وفتحت فيديوهات المراقبه بتاعت امبارح ووريتله الراجل .. الوشم كان باين في
الفيديو .. استغرب معايا وقال لي ما يمكن صدفة .. يمكن كان ناوي ينتحر من امبارح
ولا حاجة فقالك الكلام ده .. قالي لي متحاوش تشغل بالك بالموضوع .. سألته لو شاف
حد عنده نفس الوشم ده قبل كده قالي "لاء اول مره اشوفه او اسمع عن حد يحط وشم
عليه كلمه تجربه" ..
العزا بتاع "ماهر" كان بعد العشا
.. وكان في شادر في الشارع جنب الصيدلية .. دخل "شريف" الصيدلية وقتها..
شريف ده واحد من اللي ساكنين جنب الصيدلية و متعودين عليه بيجيلنا كل فتره يجيب
علاج لباباه .. قالنا ان أم "ماهر" مصره انه اتقتل ..سألته عن سبب
اصرارها .. وقتها بص لي "عمرو" حسيته عايزني اسكت وماسألش .. بس شريف رد
عليا وقال لي ان ماهر كان بيقول لامه كلام غريب .. كان بيقول لها ان في حد اداله
فلوس .. و الحد ده حيقتله..
وقتها خفت قلت فعلا متكلمش .. خفت لو كان
فعلا اتقتل واتعرف اني عارف موضوع الوشم ده القاتل يستقصدني .. وانا معرفش حاجه عن
القاتل اساسا .. بس بقيت ابص في دراع كل واحد ييجي ياخد حقنه .. ببقى خايف الاقي
وشم تاني .. وكنت بقول كده على طول لعمرو ..
مر اسبوع ولقيت شاب داخل الصيدلية .. طلب
بردك ابره وحد يدهاله ..عمرو بردك كان مشغول مع ناس وقالي ادهاله .. كل ده بيحصل
عادي كل يوم .. بس المرة دي لقيت الشاب ده في دراعه وشم "تجربه 4" ..
شفت الوشم .. ومكتوب بنفس الطريقة الغريبة وبلمت مبقتش عارف اعمل ايه .. سألته بعد
ماديته الابره "مين اللي عملك الوشم ده اصله حلو بفكر اعمل زيه؟" ..
قالي بكل برود "وانت مالك" وسابني .. بعد مطلع من الصيدليه قلت ل عمرو
كان مستغرب قوي بردك .. وبعدها قال لي ولا كأننا شفنا حاجة يعني حنعمل ايه؟ ..
بعدها بيوم جالي اتصال من عمرو .. هوه ساكن
جنب الصديلية .. قالي شفت اللي حصل .. قلتله خير .. قالي الواد اللي كان حاطط
"تجربه 4" طلع ساكن جنبنا هنا و .. انتحر .. قالي مش عارف ايه ده ..
فضلنا مش عارفين نعمل حاجة وقلنا ملناش دعوه بحاجة وقفل معايا ..
بعدها بيوم كانت اجازتي من الصيدلية .. كنت
متفق مع عمرو اني مرحش يوم الجمعه .. على المغرب جالي رساله على التليفون من نمرة
غريبة
"لو عايز تعرف سر الوشم تعالى العنوان
.. بس متقلش لحد و لازم تيجي لوحدك .. لو قلت لحد حنرسم عليك الوشم المرة
الجاية" ..
انا اترعبت وقتها .. مين عرف اني شفت الوشم
.. مين عرف غير عمرو؟ بس عمرو ميعملش كده .. احترت اكلمه ولا .. بس قلت مكلمهوش
ومرحش العنوان اساسا .. بعد مفكرت شويه قلت حروح العنوان واقف بعيد ماطلعش ..
رحت فعلا العنوان بعد العشا وفضلت واقف تحت .. مستخبي عشان محدش
يشوفني .. بعد فتره لقيتهم طالعين من العمارة .. كانو اتنين .. اعرفهم كويس .. ماعرفش اتجمعوا ازاي؟ .. لقيت عمرو طالع من العمارة .. لقيته طلع مع
الشاب اللي اخد الابره امبارح وعليه وشم "تجربه 4" .. ده اللي قالي عمرو
امبارح انه انتحر !! ..
انا بقيت مش فاهم حاجة .. عمرو كان بيضحك
عليا ؟.. هوه عارف اللي بيقتلوا اللي
عندهم الاوشام دي مثلا؟ اصل فعلا اشمعنى الصيدلية بتاعت عمرو؟ يمكن صدفة دي مرة
واحده انا مشفتش تجارب تانية غير الواد اللي طلع عايش قصادي .. انا بعد ماتأكدت
انه مشى رجعت البيت .. معرفتش انام ولا حكيت لحد حاجة ..
بعدها بيوم رحت الصيدليه بدري شوية .. سألت
حنان وامل لو حقنوا قبل كده لحد ابره وكان الحد ده حاطط وشم فيه كلمه
"تجربه" وجنبها اي رقم .. وطلعت ورقة وحاولت اقلد الطريقة المكتوب بيها
.. حنان قالتلي اه انا لفت نظري مره واحد اديته حقنة كان حاطط وشم "تجربة
1" .. بعدها قالت لأمل فاكرة لما قولتلك عليه .. اللي كان بيبص بصات غريبه
شكله كان واخد مخدرات او حاجة مكنش طبيعي .. امل اكدت على كلامها وسألتني بعدها
"انت بتسأل ليه؟" .. قولتلهم لا ابدا مفيش حاجة .. ورحت قطعت الورقة
ورميتها ..
شوية وسألت حنان .. هوه عمرو كان موجود يومها
.. بصت لأمل وقتها وبعدها قالتلي اه كان جه بدري يومها .. انا اساسا مرضتش اديه
الابره وشكله غريب كده غير عشان دكتور عمرو كان هنا .. سالتها وقولتيله على الوشم
؟ .. ردت قالتلي "اه قولتله هوه وامل على الوشم ده .. و دكتور عمرو قالي اكبر
دماغي .."
ليست هناك تعليقات:
إرسال تعليق