برواز - الجزء الثالت

فتحت الموقع وقتها لقيت اخر رساله لسه زي مهيه .. قمت كتبت ورقه بالطلب الجديد بتاع العربيه "أنا عايزه عربيه" ووقعت "أسماء" ..  وشلت البرواز وجيت احط الورقه .. ملقتش الورقه اللي فاتت ولا البخور .. بلعت ريقي بالعافيه وحطيت الورقه الجديده وقفلت .. رجعت وقلت لأشرف ورد عليا

أشرف: مش اغرب من اللي فات انا مش متخيل ازاي اصلا امنيتك بتاعت الموبايل اتحققت

حاولت يومها انام معرفتش .. كل شويه ابص للقطه واركز في عيونها .. كنت خايفه قوي .. في النص حسيتها بتتحرك .. كانت جايه عليا .. حاولت تخربشني .. معرفش ليه وقتها ماقدرتش اتحرك من السرير .. زي مكون مربوطه فيه .. حاولت اصرخ .. صوتي مطلعش .. وفي الأخر لقيته كان كابوس رخم مكنتش ناقصاه ..

بعدها بيوم دخلت الموقع لقيت طلبات القطه .. كانت بردك البخور وامسح عليها بمايه البحر و شعرايه مني .. و زودو طلب كمان .. "نقطه من دمك تتحط على ورقه الامنيات جنب التوقيع " .. وقتها حسيت اني بتعامل فعلا مع عالم تاني غير العالم بتاعنا .. عملت المطلوب كله .. بعدها قلت لأشرف ..

أشرف: انا ندمان الصراحه اني شجعتك على موضوع العربيه ده كان المفروض توقفي

اسماء: الأمنيه دي لو اتحققت فعلا ابقى لقيت كنز في الشقه هنا

بعدها بيوم دخلت الصفحه لقت مكتوب .. "مبروك امنيتك اتحققت .. حتلاقيها اسفل العماره .. مواصفتها وملحقاتها تحت المخدة ..

وقتها استغربت لحقوا فعلا يحققوا الامنيه .. بعدها قلت مهم عفاريت بقى .. ساعتها دخلت عليا نجلاء الأوضه ..

نجلاء: ايه يا اسماء مالك ؟

اسماء: مالي يا نجلاء عادي زي مانا

نجلاء: لا انت كنت بتقعدي لوحدك كتير بس مش للدرجه دي .. ده حتى الغدا بقيتي تخديه الاوضه وتاكلي لوحدك .. في ايه؟

اسماء: لا بس طالبين حاجات كتير في الكليه باعملها

نجلاء: طب ربنا معاكي بس حاولي تبقي تقعدي معايا شويه لانا زهقت يا بنتي .. مزهقتيش؟ حتى التليفزيون كله حاجات بتتعاد 

اسماء: خلاص حنزل اجيب حاجه وارجع اتغدى معاكي ان شاء الله

نجلاء: تمام حلو قوي

بعد مقفلت نجلاء الباب تاني وراها .. رحت انا قمت زحت المخدة .. لقيت فعلا تحتها مفتاح  وريموت عربيه .. وجنبهم صوره لعربيه حلوى جدا ..   اتبسطت قوي قلت يااه دي بجد ليا انا! .. فضولي خلاني انزل بسرعه .. ولقيت العربيه اللي في الصوره واقفه فعلا قصاد العمارة .. فتحت الباب بربموت المفتاح فتحت عادي .. اتأكدت وقتها انها هيه دي فعلا العربية .. أنا باعرف اسوق كويس .. بابا كان علمني على عربيته في دمنهور .. وأشرف  أيامها كان بيقلي ارشادات نظريه كده عشان يساعدني .. ركبتها وسقت بيها .. لفيت لفتين حولين العمارة .. وقتها لأول مره الموبايل الجديد يرن .. كان معايا وقتها بس لسه ماستعملتهوش .. لقيت نمره مكتوبه رديت عليها .. واحد رد عليا قال لي

المجهول: افتحي شنطة العربيه

اسماء: مين حضرتك؟

السكه اتقفلت قبل ماكمل سؤالي .. نزلت ببطء ورحت افتح شنطه العربيه .. لقيت واحد نايم في الشنطه و مربوط ومليان دم .. اول مشفت كده قفلت الباب على طول من الصدمه .. وبصيت حواليا ملقتش اي حد .. خفت قوي .. وبعدت عن العربيه بسرعه ..  قلت ارجع البيت ومجيش جنب البرواز .. ولا ادخل اوضتي اساسا .. وانا راجعه الموبايل الجديد رن  تاني كتير قوي من نفس النمره وفي الأخر بعتلي رساله ..

المجهول: احنا صورناكي فيديو مع القتيل وانتي بتفتحي شنطه العربيه .. شعرك  عليه .. وورقه مكتوب فيها انك عايزه العربيه وعليها دمك وتوقيعك كمان .. ابقي قليلنا بقى حتطلعي منها ازاي .. ردي يا ماما عليا ..

بعد ما قريت الرساله اتصل تاني ورديت عليه

اسماء: انت مين وعايز ايه مني

المجهول: انا ابقى القطه يا قطه .. وبالنسبه لعايز ايه منك فانا عايز ميت الف جنيه بس عشان ما انشرش الفيديو اللي حتلاقيه في صفحه القطه  وتروحي وقتها في داهيه .. لما تشوفيه ردي عليا ...

وقتها كان الخوف اقل من اللي حسيت بيه .. وصلت الشقه دخلت ورحت على اوضتي فتحت الموقع  لقيت فيديو ليا وانا بفتح العربيه وبسوقها وبعدها اتكلم في الموبايل وانزل و افتح الشنطه واشوف القتيل .. كله متصور ويحسس اتي قتلت القتيل ده وسايباه في الشنطه كده ..

كانت دماغي وقفت وقتها ومش عارفه اعمل ايه وميت الف جنيه ايه اللي عايزها .. انا عندي ورثي من أمي يكفي بس لو اديته حاجه اكيد مش حيبطل ابتزاز ويطلب اكتر .. واديه ليه اصلا أنا معملتش حاجه .. بعتت وقتها لأشرف وحكيت ليه كل حاجه

اشرف: يا نهار ابيض .. انت بتهزري ولا بتتكلمي جد؟

اسماء: بتكلم جد طبعا انا معنديش دماغ ولا اعصاب اهزر انا خايفه قوي يا اشرف

أشرف:  طب والقتيل ده تعرفيه?

اسماء: مركزتش في ملامحه بس مظنشً 

اشرف: طب حتعملي ايه كده شكل الموضوع كبير ودي نصبايه كبيره

أسماء: مش عارفه أنا خايفه قوي 

وقتها دخلت نجلاء عليا الأوضه وقالتلي الغدا جاهز ومستنياني نتغدى سوا .. طلعت أكل معاها وانا تقريبا مش باكل .. قاعده العب بالأكل بالشوكه وسرحانه ومش عارفه اعمل ايه ..

نجلاء: مالك يا اسماء الأكل مش عاجبك

أسماء: لاء حلو تسلم ايديكي

نجلاء: حلو ابه انت مدقتيش حاجه خالص .. للدرجاتي مش طايقه تقعدي معايا

اسماء: لا خالص انا بس ..

نجلاء قاطعتني: بس ايه وبتاع ايه .. طول اليوم بتبقي قافله على نفسك ومفيش بينا أي كلام زي منكون أغراب .. ده أنا لو ساكنه في سكن بتاع طلبه كان حيبقى أرحم من كده على الأقل حلاقي حد يونسني او ياخد بحسي .. انا بقيت بشحتك وانت لا تطاقي الصراحه .. وقامت دخلت اوضتها ورزعت الباب وراها 

بعدها رن تليفوني ..  لقيته بابا .. رديت على طول .. قالي

بابا:انت فين يا اسماء بطلبك من الصبح .. 

اسماء: معلش يا بابا اصلي نزلت وسبت التليفون في البيت

بابا: انت مبتتكلميش تسألي على ابوكي خالص ليه كده مصدقتي ولا ايه ؟ انت متتكلميش غير لو عايزة حاجه وخلاص ؟ طب اتصلي اتطمني على اخواتك حتى .. نجلاء مش بيعدي يوم غير لما تسلم علينا الا لو انا سبقت وكلمتها الأول لكن انت مصدقتي .. لولا انها متضايقه مني دلوقتي كانت ردت عليا .. طمنيني عليكم

اسماء: كفايه بقى محدش طايقني خالص كده .. انا حريحكم مني كلكم