بعدها رجعت صورة
الأوضة وقربوا لبرواز القطة ببطئ .. وفجأه البرواز بتاع القطه كان بيتحرك .. وبان ورا
البرواز فتحه زي خزنه مدفونة وراها .. ورجع تاني كلام مكتوب ..
"عشان تطلب اي
حاجة من قطة الأماني اكتبها في ورقه .. واكتب عليها توقيعك .. وحط الورقة في
الفتحه اللي ورا البرواز .. ورجع البرواز مكانه .. وادخل الموقع حتلاقي طلبات
القطة لتنفيذ امنيتك .. طلباتها بسيطه جدا متقلقش .. وحتتحقق بعدها الامنية خلال
تلات أيام .. بس الأول املى بياناتك" .. بعدها طلبوا الاسم والنوع والسن ..
مبقتش عارفه ادخل
بيااتي ولا لاء .. سألت اشرف قالي
اشرف: هوه البرواز ده موجود عندك فعلا؟
اسماء: اه هوه
نفسه بالظبط حروح اشوف فعلا في فتحة كده في الحيطة ولا لاء استناني
..
رحت زحت البرواز وأنا قلقانة .. ولقيت فعلا في فتحة بدأت تبان .. ولما شلت البرواز خالص شفت الفتحة كلها .. هيه فتحة صغيره طول كفي تقريبا زي اللي كانت في الفيديو بالظبط .. غويطة لجوه قوي .. رجعت تاني وقلت لأشرف
اسماء: اشرف الفتحة فعلا موجوده بس مش عارفه موضوع الامنيات ده ايه
اشرف: هوه غريب قوي
الصراحة .. طب ايه بتفكري تجربي؟
اسماء: انت رايك ايه؟
اشرف: انت مش حتخسري
حاجة .. ممم بس بقول لا بردك متشغليش بالك بالحاجات دي
اسماء: لا انا بفكر
اجرب مش عارفه اطلب ايه
اشرف: اقولك اطلبي
موبايل بدل موبايلك اللي بيفصل كل شوية منك اخر كام يوم و مش بنعرف نتكلم كلمتين على
بعض
اسماء: فكره بردك
كتبت بياناتي في الموقع و أخدت ورقه وكتبت عليها "أنا عايزه موبايل" .. ووقعت تحتها أسماء
حطيتها في الفتحه
ورجعت فوقيها البرواز تاني .. حسيت اني غبيه وانا باعمل كده .. قطة ايه وبرواز
بتاع ايه .. بعدها رجعت قلت لأشرف
اسماء: خلاص حطيت الأمنيه
اشرف: وطلبوا منك ايه
بعدها؟
اسماء: تصدق نسيت ابص
بس حيعرفوا منين اني دخلتها؟
اشرف: اكيد مش حيعرفوا
وحتلاقيهم لسه مستنيين يعني اكيد اشتغاله
أسماء: حدخل اشوف
واقولك
...
عملت اعاده تحميل للصفحه بشوف في اي تغير حيحصل ولا لاء ورجعت كلمت اشرف
اسماء: دول باينلهم عرفو
اشرف: عرفوا ايه ؟
اسماء: اني دخلت امنيه
.. ده دلوقتي مكتوب طلبات القطه
اشرف: لا والله اكيد
بيغيروا الكلام كل شويه يعني على اساس يعني ممكن حد حط جاجه
اسماء: أنا بدأت اخاف
الصراحه
اشرف: صحيح طلبت ايه
القطه المشمشيه دي ؟
اسماء: انت بتتريق
دلوقتي اومال لما تعرف الطلبات حتعمل ايه .. طلبت املى ايدي بمايه البحر وامسح بيها
البرواز .. واحط بخور جوه الفتحه جنب ورقه الامنيه المكتوبه واحط كمان شعرايه من
شعري على الورقة ..
اشرف: لا والله
اسماء: وكاتبين بعدها
حتتحقق الأمنيه خلال تلات ايام .. وادخل اشوف كل شويه مكان الامنيه او ارشادات
الوصول ليها ..
اشرف: الموضوع شكله
بقى مريب الصراحه متكمليش يا اسماء
اسماء: انا عندي فضول
بس شكل في عفاريت ولا ايه
اشرف: لا مش عفاريت بس
حاسس موضوع انك تعملي ارشادات ده مقلق
اسماء: طب انا حجرب
البخور ومايه البحر والشعرايه ولو دخلت لقيت ارشادات مريبه مش حكمل
اشرف: طيب بس قوليلي
قبل متعملي حاجه لتدبسي نفسك في مصيبه ولا حاجه
اسماء: انت حتخوفني
ليه .. لا حقولك قبل اي خطوه متقلقش
بعدها بيوم نفذت كل طلبات القطه المكتوبه وقلت لأشرف.. وفضلت كل شويه اشوف لو في ارشادات اتكتبت .. عدى اليوم من غير اي ارشادات ولا اي حاجه جديده ..
اليوم اللي بعده لقيت
كلام جديد مكتوب " مبروك امنيتك اتحققت .. حتلاقي صندوق فيه امنيتك تحت
السرير " .. خفت قوي لما شفت الكلام ده .. ومبقتش عارفه المفروض اشوف الهديه
ولا ايه .. قمت اتاكد ان نجلاء معايا في الشقة الأول من خوفي .. لما وصلت لباب
اوضتي غيرت رأيي وقلت أقول لأشرف الأول ..
أسماء: أشرف الحقني كاتبين ان الأمنيه اتحققت وموجوده تحت سريري ..
أشرف: ولقيتيها؟
أسماء: مبصتش خايفه ..
خايفه أشوف والاقيها فعلا ..
أشرف: مظنش حتلاقي
حاجه
أسماء: يعني رأيك اروح
اشوف
اشرف: يلا بيكي
طلعت من الاوضه واتطمنت لما لقيت نجلاء في الصاله بتتفرج على التليفزيون .. انا كده مش لوحدي.. رجعت اوضتي .. بصيت تحت السرير .. لقيت فعلا علبه .. اتخضيت اكتر لما شفت العلبه دي .. انا مطلعتش من البيت النهارده ..حتبقى دخلت ازاي دي هنا ؟ .. اخدتها وبصيت تحت السرير كويس .. فجأه وقتها باب الاوض اتفتح .. صوتت مره واحده وقتها من الخوف .. لقيت نجلاء قصادي ابتسمت نص ابتسامة كده و سألتني وقتها
نجلاء: خضيتك ولا ايه معلش دخلت مره واحده .. انتي بتعملي ايه يا اسماء؟
اسماء: كان واقع مني
حاجه قلت اشوف لو وقعت تحت السرير
نجلاء: حاجة ابه
أسماء: ورقه كده .. خلاص
لقيتها متشغليش بالك .. انت كنت عايزه حاجة يا نجلاء؟
وقمت عدلت نفسي ووقفت ..
نجلاء: لا ابدا كنت عايزه احكيلك عن حاجة خنقاني كده ..
أسماء: بس انا مشغوله
دلوقتي معلش خليها في وقت تاني ..
نجلاء: مشغوله في ايه
؟ احكيلي ايه اللي شغلك واقولك اللي مضايقني؟
أسماء: لا ابدأ
المزاكرة وطلبات في الكلية وكده ..
نجلاء: زي متحبي ربنا
معاكي
وطلعت نجلاء من الأوضة وقفلت الباب وراها
اخدت نفس
طويل و فمت قعدت على السرير ومعايا العلبه .. كانت علبه بيضا مش مرسوم ولا مكتوب
عليها حاجه غير صوره قطه .. اخدت نفس تاني وبدأت افتحها .. لقيت
جواها موبايل فعلا .. وقتها خفت قوي ويمكن خفت دي قليله .. الموبايل كان فيه كمان
خط .. رجعت كلمت اشرف
اسماء: الحقني انا لقيت علبه فيها موبايل فعلا
اشرف: انت بتشتغليني
اكيد
اسماء: استنى حصورهولك
.. وحصور العلبه انا خايفه قوي ازاي بيحصل كده
...
اسماء: شفتهم ?
الموبايل فيه خط كمان
...
اسماء: اشرف انت رحت
فين؟
اشرف: لا كده غريب
فعلا مش لاقي اي تفسير منطقي في حاجه غلط
اسماء: انا خايفه
استخدمه ولا امسكه اساسا
اشرف: مهيه حاجه تخوف
فعلا :.. طيب بقولك ايه .. لو كده اطلبي عربيه انا محتاج واحده
اسماء: انت مش مصدقني
يا اشرف؟
اشرف : لا مصدقك
بس شوفي حيعملوا ابه في موضوع العربيه ده محتاج ورق للرخصه وكده
اسماء: ماشي حجرب
ليست هناك تعليقات:
إرسال تعليق