لما قلت لاصحاب الشركه اللي بتعمل الدوا نوقف الشغل في الصيدليه عندي ونشوف طريقة تانية ندي الناس بيها الجرعات .. سألوني عن السبب وقولتلهم عليك .. قرروا يدوك انت "تجربه 4" عشان وقتها حتبقى مجبر تسايرني عشان تاخد الجرعات لو الدوا منفعش .. فوشمنا واحد تبعهم ب "تجربه 4" .. ده مجربناش عليه حاجة .. ده بعتناه بس الصيدلية ياخد حقنه وانت فيها عشان انت تشوفه واقولك بعدها انه انتحر .. وبعتلك الرساله يومها من رقم تاني عشان تيجي العنوان ونخدرك .. بس انت مجتش .. وللاسف شوفتني معاه واحنا نازلين من العماره ..
كان فيه لسه ناس في الشقة وشافوك من الشباك .. كلموني
وقالولي انك شفتنا .. فاضطريت اقولك اني كنت بهزر معاك وكده .. مكنتش عارف وقتها
انك سألت حنان وامل الصبح وعرفت منهم اني عارف ان "تجربة 1" جه الصيدلية ..
و النهارده الصبح لما حنان قالتلي انك سألتهم
عرفت انك شاكك فيا و كشفتني قوي.. فرحت عندكم البيت و اديت ياسمين البومبوني اللي
فيه الدوا بتاع "تجربه4" .. معرفتش اوشمها عندكم في البيت فرسمت الرسمه
على ايدها عشان انت تفهم .. انت كده لازم تطيعنا وتبقى معانا عشان محدش عنده جرعات
الدوا غيرنا .. مفيش حد تاني حيقدر يعالجها غيرنا .. لو بلغت عننا مش في مصلحتك ..
محستش بنفسي وانا بضرب عمرو .. بعدها قال لي
حقك برده انت لسه مصدوم .. بس انت لازم تعذرني انا بيهددوني انا كمان .. لو معملتش
فيك او في ياسمين كده كانوا هما حيعملوا فيا كده او يقتلوني دول مش ساهلين ..
قلتله "وفي مين كمان معاك؟" ..
قالي "تقصد مين؟" .. قلتلوا "اقصد امل وحنان؟" وقتها سكت وانا
افتكرت نظرات امل ومكالمتها فكملت كلامي .. "امل اكيد معاكم" فضل يضحك
وقال لي "انت ذكي قوي" .. افتكرت وقتها ان موبايلي كان مقفول لما راح
ادى الحقنه لياسمين .. مين يقدر يقفل موبايلي غير حنان لما كلمتني عشان اروح
الصيدلية ! .. وقتها قلتله "حنان هيه اللي اكيد معاكم .. اكيد هيه اللي قفلت
موبايلي" وقتها ابتسم وقال لي "حنان اضطرت تقولك على موضوع تجربه 1 لما
انت سألت عشان امل كانت موجوه وقتها" ..
حسيت اني بكلم عمرو تاني غير عمرو اللي اعرفه
.. حتى حنان حسيت انها بقت واحده تانية .. ازاي بيعملو كده .. وفضلت شاكك في
"امل" .. مش عارف هيه مع مين ..مر كام يوم وانا بطاوعه .. مجالناش منهم
غير واحد عليه وشم "تجربه 5" يومها اديته الابره وانا ساكت ولا كاني شفت
حاجة .. وركزت مع عمرو واخدت فعلا بالي لما حطله البومبوني ..
كان لازم اعمل كده وافضل ساكت .. كنت خايف
على ياسمين .. اينعم مظهرش عليها علامات زي اللي قال لي عليها ولا احتاجت من الدوا
تاني .. بس كنت خايف لما تبان عليها الاعراض.. مكنتش بتكلم مع حنان ولا امل الا
على قد الحاجة .. حتى عمرو مكنتش بحاول اكلمه .. بس سألته بعد "تجربه 5"
ممشى .. "هوه انتوا ليه عملتوا خامس تجربه من غير مايبان التاثير على رابع
تجربه اللي هيه ياسمين .. مهيه مبنش عليها لسه اي اعراض الحمد لله ؟" رد عليا
رد مختصر "ملكش دعوه" وسكت .. وانا سكتت بردك بالعافيه ومبقتش اكلمه في
الموضوع ده خالص ..
بعد كام يوم لقيت حد جالنا البيت بيخبط جامد
.. فتحتله .. لقيت عمرو مسكني من ياقه هدومي اول مفتحت وقال لي .. "رجع الورق
اللي اخدته يا ياسين" فضلت اقول له اني مخدتش حاجة ومش فاهم بيتكلم عن ايه ..
بعدها لقيت راجل وراه حقن عمرو بحقنه ونزل
جري .. بدأ عمرو يتألم وبيقع من طوله .. انا مكنتش فاهم اي حاجة .. فنقلته لاقرب كرسي
يقعد عليه .. قالي وهوه بيتألم
"عملوها فيا عشان مقدرش اعترف عليهم وابق تحت طوعهم .. الابره دي فيها
التجربه السادسة" ..سألته عملوا ليه كده و ورق ايه اللي سألتني عليه ؟ .. رد
عليا وهوه بيتألم جامد ..
قال لي "الورق ده كان فيه بيانات
ومعلومات عن التجارب اللي بنعملها والشركه اللي بتموله .. كنت باخده معايا
الصيدلية كتير اراجع حاجات" .. افتكرت وقتها امل لما قالتلي ان في ورق وقع
منها بالغلط وكان فيه صورة الوشم ..
قال لي "حد اخد الورق .. اكيد انت يا
ياسين اخدته عشان تبلغ عننا .. لما الشركه عرفت ان الورق اتسرق مني .. هددوني لو
مرجعتهوش حيحقنوني بالدوا الجديد" .. قلتله بس دي حقنه مش بومبوني .. قال لي
مهوه ممكن يتاخد بحقنه بس تاثيرها بيبقى اقوى وبتوجع جدا .. زي مانت شايف كده ..
قلتله "طب كده ايه اللي حيحصل؟" ..
قال لي "لو انت وصلت الورق للبوليس اكيد حيتقبض عليا وعليهم" .. قلتله
"طب وياسمين ؟ وقتها حنعمل ايه؟" .. قالي لا متخفش .. انا مقدرتش اعمل
كده في ياسمين .. يومها اديتها بومبوني عادي مقدرتش اديها الدوا فعلا .. انا بشوف
فيها يسرا مقدردتش اعمل فيها كده ..
بعدها دخل ناس قبضوا عليه ونزل معاهم .. طلعت
ماما ويسرا يفهموا ايه الدوشه دي وانا خليتهم يرجعوا لجوه تاني وقلبي اتطمن على
ياسمين .. لما رحت القسم يستجوبوني شفت امل قالتلي "انا يوم مكلمتك كنت عايزه
اقولك حاجة مهمه وخفت اقولهالك متصدقنيش .. انا كنت سمعت دكتور عمرو بيكلم حد في التليفون
وبيتكلموا انهم حيدوك زي سم او حاجة مفهمتش" .. قالتلي لما لقيت الموضوع مريب
كده بلغت عن اللي شفته وسمعته كله .. وهما قالولي اجيب الورق كدليل .. وانا اخدته
من ورا عمرو وقدمته للشرطة ..
وقتها فهمت ان امل مش معاهم .. وانها خايفة
منهم زيي وكانت جاية تحذرني .. اتقبض على حنان كمان عشان كانت بتساعده .. قالت
انها معرفتش الموضوع غير بعد "تجربة 1" وإن دكتور عمرو قالها وكملوا سوا
عشان كانو بيدفعولها حلو ..بس الشرطه معرفتش توصل لصاحب الشركه اللي بتمولهم ..
انا زرت عمرو في السجن بعد فتره .. كنت قلقان
ليكون بان عليه اثار جانبيه للحقنه بس الغريبة لقيته كويس .. لقيته مقتنع ان هوه
مش غلطان .. وان الناس اللي كانت بتروح لهم برجليها عشان تاخد فلوس ..
بعدها بكام يوم جالي تليفون من امل .. قالتلي
"شفت اللي حصل" .. قلتلها "خير؟" قالتلي جوز حنان انتحر
امبارح .. قلتلها "انتحر!" قالتلي اه .. قالتلي لما حنان عرفت قالت انه
كان "تجربة 5" اخر تجربة جت الصيدلية .. كانت هيه وجوزها محتاجين فلوس
كتير قوي عشان يعملوا عمليه لابنهم .. وعمرو لما عرف اقنعها ان محدش بيحصل له حاجة
من التجارب دي الا لو ماستمرش على الدوا .. عشان كده وافق جوزها انه يبقى
"التجربة 5".. لما اتقبض على عمرو وعليها جوزها وقف الدوا عشان معرفش
يجيبوا منين .. وبدأت تظهر عليه الأعراض لغاية مانتحر ..
بعدها حنان اعترفت بحاجة جديده خالص .. قالت
ان "عمرو هوه صاحب الشركه" .. وقتها انا استنتجت ليه عمرو مبنش عليه اي
اعراض .. اكيد متحقنش اساسا بالابره ..
بس عمرو انكر كده .. و بعدها بكام يوم بدأت
اعراض غريبة تبان على عمرو في السجن .. انتهت باكتئاب وده طبيعي يحصل له مهوه في
سجن .. وفي الاخر بردك انتحر ..
انا مزعلتش على عمرو .. مقدرتش ازعل عليه ..
كملت تدوير على شغل وكملت حياتي .. بدأت اتقرب ل"أمل" .. الاحداث دي
خليتني اقرب منها جامد ..وبدأت حياتي تبدأ من جديد بس من غير وشم ومن غير تجارب ..
ليست هناك تعليقات:
إرسال تعليق