حياة مع المجهول - الجزء الرابع والأخير

ماما: انا عارفه انك مش حتصدقينا يا بنتي

حياة: لا مصدقاكم يا ماما .. بس اللي مش فاهماه اني مش فاكره خالص موضوع الذهب ده .. وليه اشوف ام شوقي بتاخد الفلوس مش انا وحابق وديتها فين ..

ماما:  طب تعالي نشوف في اوضتك يمكن حطتيهم في حته هناك ..

دخلنا كلنا الاوضة ودورنا كويس .. ملقيناش أي حاجة منهم .. كل شوية ابص للمج الثابت المحطوط وهوه مليان ماية .. طلعنا تاني من الاوضة .. وبره بابا سألني ..

بابا: ايه رايك تروحي معانا للدكتور يا حياة

وافقت وقتها ورحبت بشدة انا فعلا محتاجة لكده .. محتاجة لحد احكيله على كل اللي شفته ومش عارفه اقولهولهم .. اعرف احكيله على المج وصوته .. و البيبي اللي لقيته لما كلمت ادم  .. عن شعوري بالقهر لما ماما نصفت ام شوقي عليا ..

رحنا للدكتور اللي قالنا الأحسن اني افضل كام يوم في مصحة خاصه .. وقال ممكن الفتره تطول بس حتبقى المتابعه معاه احسن وافضل ليا .. انا مهمنيش .. كان نفسي ابقى احسن .. نفسي افهم انا فعلا مجنونه .. ولا في ظواهر اقوى مني بتحركني ..

بعد مرور فتره صغيره قوي لقيت الدكتور بيقولي في يوم

الدكتور: خلاص يا حياة انتي حتروحي بكرة

حياة: فعلا؟ مش حضرتك قلتلي ان العلاج ممكن يطول ؟

الدكتور: لا انت خفيتي فعلا يا حياة وفي مدة قليله جدا مكنتش متخيل كده

حياة: وبابا وماما عرفو؟

الدكتور: اكيد وحيجو يوصلوكي بكرة ان شاء الله

حياة: طب يا دكتور ازاي انا مش فاكرة فين الذهب والفلوس ولا الموضوع ده خالص

الدكتور: متشغليش بالك بالتفكير في الموضوع .. بمرور الوقت حتعرفي ..

فضلت محتاره بعد كلامي معاه انا فعلا خفيت؟ وخفيت بسرعه ليه؟ شكيت ان فعلا في قوى خارقة هيه اللي ساعدت على اني اخف .. وساعات اقول لا انا اكيد مخفتش مانا مش فاكرة فين الذهب .. طب الدكتور حيطلعني ليه بدري؟

في الاخر قررت اتعامل اني خفيت .. واكدت على بابا وماما لما جهم يخدوني ان مهما حصل مني غريب يقولولي وقتها ويواجهوني في لحظتها .. وقلت بيني وبين نفسي وانا لو حصل اي غريب لازم اقولهم ..

روحت معاهم البيت .. لما وصلنا لقيت ام شوقي عامله الغدا ومستنيانا وبتسلم عليا

حياة: انا اسفة يا ام شوقي على اللي قلته

ام شوقي: بتتاسفي عل ايه انا عارفه مش بايدك حمد الله عل سلامتك

حياة: الله يسلمك

ام شوقي: انت خفيتي خالص كده؟

حياة: اه الدكتور قال كده يا مسهل

ام شوفي: طب بالبركه غمه وراحت .. انا عامله الغدا اللي بتحبيه النهاردة

حياة: حغير هدومي بس واجي اتغدى

اخدت ازازه ماية و دخلت اوضتي عشان اغير هدومي .. بصيت للمج اللي على المكتب .. سميت الله وصبيت فيه شوية ماية .. كنت قلقانه قوي ومش عارفه حيحصل ايه .. مليت الكباية كلها .. وفضلت متنحالها .. بس مفيش حاجة حصلت ..

بعدها قلت ..

حياة: تيته انتي هنا؟

..

حياة: يعني خلاص مش معايا؟

..

شربت شوية من الماية وجربت تاني اسألها ..

بعد محاولات كتير فجأه ماما فتحت باب الاوضة ..

ماما: بتكلمي مين يا حياة؟ مفيش حد معاكي

حياة: عارفه يا ماما متقلقيش انا كنت بأتاكد بس ان فعلا مهما جربت مش حلاقي حد

ماما متعرفش موضوع المج ومتعرفش بجرب ايه .. بس بردك حسيتها اتطمنت من كلامي ..

ماما: طب يلا غيري هدومك وتعالي نتغدا

بعدها مر اليوم وفضلت طبيعيه تماما .. وبعدها بيوم الصبح.. جت ام شوقي صحتني ..

ام شوقي: صباح الفل

حياة: صباح النور

ام شوقي: معلش اصل بابا وماما نزلو من بدري وقالولي اصحيكي

حياة: راحو فين؟

ام شوقي: مقالوليش .. ماما بس قالتلي اصحيكي واعملك الفطار وانا جهزتهولك ..

قمت وفطرت و بعد الفطار فتحت التلفزيون و قلت لام شوقي تعملي القهوه كانت وحشتني من اديها جدا .. وهيه بتعمل القهوه وانا بتفرج على التلفزيون فكرت اقوم اشوفها بتعملها ازاي .. رحت المطبخ .. ووانا واقفه على الباب كان ظهرها ليا .. حطت السكر والقهوه .. و بعدين لقيتها بتحط معاهم حاجة كمان !!

فضلت متنحه كانت قطارة بتحطلي منها نقط .. جه في بالي ان ده حاجة من تلاتة .. يا دوا الدكتور قالهم عليه .. بس وقتها كانت حتقلي الأول مش حتحطه من ورايا .. والتاني ان ده حاجة .. حاجة بتخليي اهلوس كده .. والتالت اني بهلوس بردك وهيه مش بتحط حاجة ..

رجعت ببطئ لمكاني عشان متعرفش اني شفتها .. وفضلت افكر .. اكيد دي حاجة بتخليني اهلوس بتحطها في القهوه ..اكيد هيه اللي اخدت الذهب والفلوس .. واكيد لو قلت لبابا وماما مش حيصدقوني .. اكيد حيقولو رجعت اتجنن انا حتى خلصت العلاج بدري قوي .. قلت لازم مبينلهاش اني عرفت دلوقتي لغاية مفكر حاعمل ايه ..

جابت القهوه وجت حطيتها قدامي وشكرتها زي كل مرة .. ورجعت المطبخ .. رحت قمت كبيتها في الحمام ورجعت مكاني ..

مرة اسبوع وانا طبيعيه تماما .. مكنش فيه مج بيتكلم .. ولا اضافات غريبة .. ولا فلوس بتنقص .. وبعد الاسبوع كنت انا وماما وام شوقي في الشقه و لقيت مرة ماما بتزعق في الصاله .. طلعت اشوف في ايه

ماما: فين الفلوس اللي كانت في الدرج

بصيت لام شوقي اللي بصت عليا بنظرات عطف و ضربت كفوفها فوق بعض وقالت

ام شوقي: لا حول ولا قوة الا بالله .. تاني معلش يا ام حياة

وقتها فهمت انها اخدت الفلوس وبتدبسني .. بس ماما اكيد مش حتصدقني .. وقتها حسيت قد ايه اني ضعيفه .. مفتحتش بقي ولا دافعت عن نفسي .. عيطت وبس .. ماما جت وقتها حضنتني جامد وقالتلي ..

ماما: بس يا حياة متعذبيش نفسك يا بنتي ..

بعدها بصت لام شوقي وقالتلها

ماما: ليه كده يا ام شوقي .. احنا كنا معتبرينك واحدة مننا .. عمرنا مقصرنا معاكي ولا طلبتي حاجة ومعملنهاش .. ليه تعملي فينا وفي بنتي كده!!

مصدقتش وداني لما سعت ماما .. بس عرفت منين

اتصدمت ام شوقي من كلام ماما ليها

ام شوقي: وانا .. انا عملت ايه يا مدام سعاد .. حياة هيه اللي عقلها بق خفيف شوية وبتعمل حاجات غريبة انا مالي؟

وقتها لقيت بابا داخل من باب الشقة ومعاه ناس بيقبضو عليها  .. 

ماما: الدكتور بعد ماتكلم معاكي شك ان بيتحطلك حاجة  تخليكي تهلوسي .. ولما خفيتي بسرعه قالنا لازم تحطو كاميرات في البيت وتراقبو خصوصا المطبخ ..

بابا: فضلنا كل يوم نشوف ام شوقي بتحطلك قطرة ولما قلنا للدكتور اسمها اكدلنا فعلا انها بتاعت هلوسه .. اتبسطت قوي لما شفتك من اول مرة  شفتيها وبتكبي القهوه بس خفت نتكلم نبان قصادها اننا عارفين ..

ماما: استنينا لما سرقت تاني وبابا نزل بلغ عنها والدكتور راح معاه .. انا اسفة يا حياة انا اسفة يا حبيبتي

بعد التجربة دي .. انا اتقربت قوي من ماما وبابا .. ومبقتش اخاف من حاجة طول مهما معايا .. لغاية مجه يوم لقيت اضافة على الفيس من واحد اعرفه كويس "ادم اسماعيل" كان نفس اسمه ونفس صورته .. بصيت للمج اللي بملاه ماية كل يوم لقيته ثابت ..

رحت قلت لماما اللي قلقت وجت تشوف .. وابتسمت وقالتلي

ماما: اه هوه .. وافقي يا حياة .. طنط ليلى عرفت كل حاجة يمكن حكتلو

رفضته وقتها .. انا كان هامنني اتأكد انه هوه فعلا . مش هلاوس .. كنت عايزه ابعد عن اي حاجة تفكرني بأيام التعب .. ايام مكنت عايشه مع السراب ..

مر تلات شهور وخالو "عماد" رجع .. بعد ما كان كلنا يأسنا من نزوله .. واتجمعوا سوا .. وافتكروا جواب تيته اللي سايباه .. قبل ميفتحوه سألت ماما..

حياة: ايه صحيح طلع مين اللي كتبه؟

ماما: مش عارفه مين بس مكنتش ام شوقي والله اعلم بيها مبقتش اثق فيها .. بس لما سألتها قالت متعرفش عنه حاجة ..

حياة: الله اعلم

بدأ خالو عادل بما انه كبيرهم يقرى الجواب .. تيته مسلمه عليهم كلهم .. موصياهم ميخلوش زعلهم عليها يأثر عليهم كتير .. موجهه كلام لكل واحد فيهم .. موصياهم ياخدو بالهم على عيالهم وميزعلوهمش .. باعته لخالي عماد فرحانه انه نزل اول معرف وفاتها حبيبتي مكنتش متخيله انه حيغيب قوي كده عليها .. عيطت لما سمعتهم بيقروا جزء سلامها ليا .. وبتوصيني ادعيلها كتير ومفضلش زعلانه كتير  .. و مصوياهم على ام شوقي و .. و محذراهم منها .. قالت انها لاحظت ان ام شوقي بتسرق منها كتير بس بتكبر دماغها .. و موصياهم ما يثقوش فيها ..

خلص قراية ودعينا لتيته بالرحمة .. وقرينالها الفاتحة ..

حياة مع المجهول - الجزء الثالث

الصوت: وحتعملي ايه في البيبي

حياه: مش عارفه حفكر لغايه بكره اقولهم ايه الا لو شافوه قبلها حابقى في مصيبه ..

الصوت: وماله نفكر سوا

حاولت افكر كتير في أي طريقة بس موصلتش  لأي حاجة .. حتى المج موصلش لأي حاجة ينفع تتقال لهم .. كل شوية ابص على البيبي النايم ببراءة على السرير وخايفه أكون غلطت لما اخدته وتكون مامته دايخة عليه وقلبها واجعها من بعاده ..مجاليش نوم طول الليل وانا بفكر .. وكنت قلقانة حد يصحى من صوت عياطة وييجي يسألني عنه .. ..

بعدها بيوم الصبح طلعت من اوضتي .. لقيت ماما في المطبخ .. استنيتها تسألني عن عياط البيبي .. بس ملقتهاش مركزه معايا خالص واضح انها مسمعتهوش .. كانت بتحضر الفطار ..

حياة: صباح الخير يا ماما ..

ماما : صباح النور يا حبيبتي .. 

حياة: امال فين ام شوقي؟

ماما:نزلت امبارح بليل باتت عند ابنها .. زمانها على وصول متفقين تيجي من بدري

حياة: كويس حستناها تعمل لي القهوه مش بتطلع معايا حلوه

ماما: خلاص حاعملهالك انا بس بعد الفطار .. وبعد متشربي القهوه ان شاء الله عايزين انا وبابا نتكلم معاكي شوية ..

قلقت من جملتها .. هما سمعوا عياط البيبي ولا ايه .. بس استنوا ليه كل ده؟

حياة: تتكلموا معايا في ايه؟

ماما: لا ده موضوع كبير ومحتاج قاعدة .. بعد القهوه تكوني مفوقه كده ونتكلم ..

رحنا فطرنا .. واحنا بنفطر ام شوقي جت .. وانا طول الوقت دماغي ما بين حيقلولي ايه وانا اقولهم ايه على البيبي .. ومستغربه اني مش سامعه ليه أي صوت ..

بعد الفطار دخلت الاوضة بتاعتي .. ملقتش البيبي على السرير .. سألت المج ..

حياة: هوه راح فين؟ فين البيبي؟؟

الصوت: ممم غريبة .. مش عارفه يا حياة .. انا  مبكنش موجودة وانت مش في الاوضة ..

اتوترت قوي .. يكون حد مثلا دخل الاوضة و اخده .. يمكن ماما وبابا شافوه وحيسألوني عنه .. طلعت على صوت ماما بتنادي عليا بصوت يقرب للزعيق عن انها بتنادي ..

ماما: حياة تعالي هنا ..

طلعت لقيت بابا وماما في الصاله وماما باين عليها متضايقه قوي .. وقتها اتأكدت انها حتسألني على البيبي .. بس لقيت الموضوع غير ده خالص ..

ماما: فين الالفين جنيه اللي كانوا في الدرج هنا؟

حياة: ماعرفش انا مجتش جنب الدرج ده .. افتكر ام شوقي امبارح اخدت فلوس منه تدهالك

كانت ام شوقي معدية وأول مجبت سيرتها وقفت .. استغربت قوي وقالت

ام شوقي: انا!! لا محصلش خالص امتى ده؟

حياة: امبارح بليل لما طلعت من تحت .. مش كان معاكي فلوس من الدرج وقولتيلي ماما عايزاها؟

ام شوقي ردت وهيه متضايقة جدا : لا محصلش .. انا عمري ما مديت ايدي على فلوس..

ماما: كفاية يا حياة .. أم شوقي انا اسفة لو سمحتي سيبينا مع حياة شوية

استغربت رد فعل ماما قوي .. ازاي تصدقها وتكذبني .. ازاي بسهوله قوي كده

ماما: وفين الذهب اللي كان في اوضتي يا حياة؟ ام شوقي بردك اللي اخدته؟

حياة: ذهب ايه؟ ماعرفش حاجة عن الموضوع ده ..

ماما: ام شوقي شافتك لما اخدتيه من اوضتي وقالتلي ..

حياة: وصدقتي ام شوقي اني سرقت وبتكذبيني أنا !! ازاي

كنت مذهوله ومستغربة ومش فاهمه ازاي كده .. كانت صعبانة عليا نفسي قوي ..

بابا وقتها اتدخل وقال لماما

بابا: براحة شوية يا سعاد .. انت عارفه انها تعبانه

حياة باستغراب: مين اللي تعبان؟

بابا: انا كنت عايز اكلمك بعد شوية انا وماما بس لازم نتكلم دلوقتي احسن 

ماما وقتها كانت بدأت تهدى شوية .. حسيت من نظراتها اني صعبت عليها فجأه من بعد مكانت متعصبه .. 

بابا: اقعدوا يا جماعه خلينا نتكلم واحنا قاعدين

رحنا قعدنا على الانتريه مع بعض وبدأت أصعب مواجهه ليا

بابا: احنا ملاحظين يا حياة انك تعبانة من يوم وفاة جدتك .. نفسيتك اتأثرت جامد بعدها .. 

بابا: احنا سألنا دكتور وقالنا الأحسن نصارحك بكل حاجة .. في الأول مش حتصدقينا اكيد .. ومش حتقتنعي بكلامنا .. بس احنا معاكي يا حبيبتي ..

كان بيسكت بين الجمل كأنه مش عارف يتكلم .. وكلامه كان بيوترني اكتر .. لما شافوا البيبي فهموا ايه بالظبط .. ولا قصده سمعوني وانا بكلم المج وفكروني بكلم نفسي مثلا !!

بابا: بعد ما جدتك اتوفت .. بدأتي تبصي بصات غريبة شوية في الأول يا حياة .. كان الموضوع بسيط لغاية مجه يوم مرحتي النادي مع مامتك عشان تشوفي العريس .. العريس اللي كانت جايباه طنط ليلى

حياة: ايه اللي حصل يومها يا بابا؟؟

بابا: قوليلها انت يا سعاد ما أنت اللي كنت معاها هناك

ماما:لما جهم كنتي بتعملي حاجات غريبة .. مكنتش فاهمه بتعمليها ليه .. بس لما مشوا وقلتيلي على نفين فهمت ..

حياة: فهمتي ايه يا ماما انا مش فاهمه حاجة ..

ماما: حياة لازم تعرفي ان نفين .. ان نفين مكنتش موجوده يومها ..

ماما سكتت شوية .. وانا كان زي ميكون حد ضربني على دماغي من الجمله .. بعدها كملت 

ماما: بعد مجت ليلى انتي سلمتي عليها وبعدها كلمتي حد مش موجود وفضلتي باصة عليه .. انا مكنتش عارفه اعمل ايه ولا اقولك ايه .. وكل شويه كنت بتبصي للفراغ بصات غريبه .. ليلى وادم لاحظوا ده بردك بس محدش سألني .. كانت نظراتهم ليكي كفيله .. ليلى سألتني واحنا في المعرض وقلتلها ان نفسيتك تعبانة شوية من بعد وفاة جدتك .. وقتها قالتلي لازم تشوفي دكتور ..وواحنا مروحين بردك سلمتي على حد مش موجود .. مكنتش عارفه الصح اعمل ايه وقتها .. لما جيت وسألنا دكتور انا وبابا قال لو اتكرر الاحسن نقولك .. ونواجهك ..

افتكرت وقتها رد فعلهم لما سلمت على نيفين .. كلهم بصولي باستغراب واتضايقوا .. انا فسرت وقتها استغرابهم غلط .. فكرتهم متضايقين اني عاملت نفين وحش .. افتكرت ادم اللي مبصليش غير لما كلمت نفين لما ماما وطنط ليلى راحوا يشوفوا المعرض.. و ماما فعلا مسلمتش على نفين لما وصلوا ولا واحنا ماشيين ..

بلعت ريقي وسكتت .. وفضلت افكر بيني وبين نفسي .. طب المج .. اكيد انا اتجننت .. اكيد عندي مرض بيخليني اشوف الحاجات دي ..

بابا: انا عارف انه صعب تصدقي بس ده اللي حصل يا بنتي

حياة: مصدقة يا بابا .. حتكذبوا عليا ليه .. بس احكولي كل حاجة ..

ماما: بقالك فتره قافله على نفسك باب الاوضة .. و بتكلمي نفسك .. من يومين جت ام شوقي قالتلي انك اخدتي الذهب من اوضتي .. استنيتك تقولي ما قولتيش .. وامبارح بليل كمان لما قلتيلي على إضافة ادم ليكي ..

حياة: ايه اللي حصل وقتها؟؟

ماما: شاورتيلي على بنت بعتالك إضافة اسمها "نغم" وحاطة صورتها وقلتيلي اهو ادم ده اسمه ودي صورته

وقتها مبقتش فاهمه أي حاجة .. انا بتخيل كل ده .. يعني ايه .. مفيش نفين .. ادم ما كلمنيش .. المج اكيد خيالي .. ومش بعيد البيبي كمان كان وهم .. وذهب ايه اللي بتقول عليه .. وليه شفت ام شوقي بتاخد فلوس وهيه مخدتش حاجة؟

ماما: انا عارفه انك مش حتصدقينا يا بنتي

حياة: لا مصدقاكم يا ماما .. بس اللي مش فاهماه اني مش فاكره خالص موضوع الذهب ده .. وليه اشوف ام شوقي بتاخد الفلوس مش انا وحابق وديتها فين ..

ماما: طب تعالي نشوف في اوضتك يمكن حطتيهم في حته هناك ..

دخلنا كلنا الاوضة ودورنا كويس .. ملقيناش أي حاجة منهم .. كل شوية ابص للمج الثابت المحطوط وهوه مليان ماية .. طلعنا تاني من الاوضة ..

حياة مع المجهول - الجزء الثاني

بعد كام يوم ..  وانا قاعده في اوضتي على المكتب وفاتحه اللاب .. كنت فاتحه الفيس بوك .. لقيت اضافة من حد .. فتحت طلب الاضافة لقيت صورته واسمه قدامي .. "ادم اسماعيل" ..

اتبرجلت قوي لما شفت الاضافة .. ايه اللي فكره بيا وليه اضافة كان باين قوي انه مش موافق .. معرفش ليه عطشت قوي وقتها .. اخدت ازازه الماية وملقتش كوبايتي اصب فيها الماية .. فكرت وقتها في مج تيته القديم .. صبيت فيه الماية وبدأت اشرب .. وانا بشرب فكرت في تيته وقد ايه كان نفسي تبقى معايا اناقشها اعمل ايه وقتها ..

بعد مشربت نص الكباية وسبتها .. سمعت صوت بيقول لي

الصوت: اسألي مامتك توافقي ولا لاء .. احكيلها

اتخضيت قوي .. بلعت ريقي بصعوب قوي .. فضلت ابص حواليا ملقتش اي حد ..

الصوت: متقلقيش مني ..

وهوه بيتكلم وقتها شفته .. كان بيحرك بقه وعينه متجهه عليا .. منحوته الحيوان اللي على المج  ..غمضت عينيا وقتها شوية وفتحتها تاني ببطئ شديد وانا باصه على المج وبقول في عقلي ..

حياة: اكيد بيتهيألي .. اكيد بيتهيألي

لقيته لسه باصص ليا بعينيه وبيرد عليا بنفس صوته

الصوت: لا مش بيتهيألك .. انا باتكلم فعلا

وقتها غمضت تاني عيني .. بس قريت الفاتحة واية الكرسي والمعوذتين وسورة الصمد .. كان قلبي خايف قوي وانا مرعوبة .. سامعه دقات قلبي اللي بتدق بسرعه .. رجعت فتحت عيني براحة وبسأل نفسي يا ترا حلاقي كل ده اختفى ؟ .. بس للأسف .. لقيت الصوت بيتكلم .. والحيوان لسه باصص ليا بعينيه ..

الصوت: صدق الله العظيم .. انتي خايفه مني قوي كده ليه ؟ .. متقلقيش يا حياة .. انا تيته .. روحي رجعت في المج ده .. كل متعوزيني بس امليه اي سائل و حتلاقيني جيت.. انا اعرف اسمع افكارك من غير متتكلمي يا حبيبتي .. انا جنبك على طول ..

فضلت متنحة للمج وانا حاسه اني بحلم .. مش عارفه افوق ازاي من الوهم ده .. كبيت الماية اللي فيه على الأرض .. لقيته في ثانيه رجع لطبيعته ولا كأن في حاجة .. مسحت الماية بفوطة صغيره عندي .. وبعدها رجعت مليت فيه شوية ماية تاني .. لقيته اتحرك تاني و بيقول ..

الصوت: مش قلتلك صدقتيني دلوقتي يا يويو؟

كبيت الماية تاني اللي فيه وطلعت من الاوضة خالص .. قعدت مع ماما بره .. كانت في الصاله بتتفرج على التلفزيون .. قعدت على الكرسي اللي جنبها اتفرج .. او اعمل نفسي باتفرج ..

ماما: اخيرا طلعتي من الحبسه اللي حبساها لنفسك في الاوضه دي ليل نهار كده

حياه: عادي معلش النت والقرايه بيسلوني بردك

بفكر اقول لماما ازاي اللي حصل اكيد مش حتصدقني .. انا نفسي مش مصدقه .. قررت احاول اصبر شويه قبل ماحكليها اي حاجه .. بعد شويه سبتها ورجعت الاوضه  تاني .. اول مدخلت بصيت على المج .. كان فاضي وثابت و زي ميكون مفيش حاجه حصلت .. مسحت الماية اللي كنت كابتها قبل ماطلع على الأرض .. وبعدها مسكت الازازه وسميت الله وصبيت شوية ماية تاني .. و رجع تاتي الوش اتحرك وعيونه بصت لي والصوت اتكلم ..

الصوت: مش حتصدقي دلوقتي بس مع مرور الوقت حتتأكدي .. المهم متقوليش لاي حد عشان محدش حيشوف ده غيرك ..

فضلت باصاله وانا بين الخنقه والخوف والحيره .. لقيته كمل كلامه

الصوت: يلا بقى قولي لماما

ولأول مره ارد عليه بصوت وتقريبا كنت بزعق 

حياه: انت مش لسه قايل لي متقوليش لأي حد و محدش حيصدقك ؟؟

الصوت: وطي صوتك بشويش مش كده .. اللي يسمعك دلوقتي يقول عليكي ايه؟ .. كمان ليه بتتكلمي اني مذكر .. اعتبريني تيته يا حياه ..

سكتنا وانا مش لاقيه كلام اقوله وفضلت باصه لعيون الحيوان اللي قصادي مش قادره اتخيل ان روح تيته ساكناه فعلا .. الكلام ده مش داخل دماغي خالص .. كمل كلامه وقتها ..

الصوت: انا كان قصدي تقولي لمامتك على اضافه "أدم" ليكي .. انت نسيتي ولا ايه؟

انا فعلا نسيته .. اللي حصل بعد مشفتت طلب الاضافة وكلام المج الغريب ده ليا خلاني انسى اضافه ادم.. فتحت شاشه اللاب اللي كانت اسودت لقيت طلب الاضافه بتاعته لسه قصادي .. والصوت كمل كلامه

الصوت: مستنيه ايه يلا قولي لماما

حسيت فعلا ان عنده حق .. او عندها لو فعلا دي تيته .. وطلعت قلت لماما ..

حياه: تخيلي يا ماما اللي اسمه ادم ده عامل ليا اضافه على الفيس .. هوه ليه عين بعد اللي عمله هوه ونفين ..

ماما بصت ليا بحيره وردت عليا

ماما: ميمكن ده واحد تاني اسمه ادم بردك؟

حياه: لا ده حاطط صورته يا ماما .. انا عرفته من الصوره اساسا

ماما استغربت وقامت دخلت معايا الاوضه .. اول مدخلنا بصيت على المج لقيته فيه المايه اللي حطيتها اخر مره و كان ساكن وثابت عادي رغم انه مليان .. ماما عينها كانت على اللاب وقالتلي

ماما: فين الاضافه؟

شاورتلها على صورته وقلتلها 

حياه :اهي يا ماما مش دي صورته؟ اكيد مش صدفه

ماما بصت ليا باستغراب وقالت لي

ماما: ارفضيه يا حياه .. بلاش نعمل كلام ملهوش لازمه 

حياه: طيب يا ماما انا كمان بقول كده

ماما: خلاص ارفضيه وتعالي اقعدي معايا .. بلاش قاعده لوحدك كده كتير .. بابا خلاص قرب ييجي من الشغل اقعدي معانا شويه ..

حياه: حاضر يا ماما

وماما طلعت من الاوضه .. وانا اتخضيت لما الصوت اتكلم على طول اول مطلعت وقال لي

الصوت: يلا بيكي يا حياه

بصيت على المج بغل قوي .. ورفضت الاضافه .. بعد مرفضتها لقيت ادم بعتلي رساله ..

ادم: ازيك عامله ايه؟

بصيت للرساله ومحتاره .. ارد .. ولا اسكت .. ولا اعمل له بلوك وميشفنيش ولا يعرف يكلمني تاني .. رد عليا الصوت

الصوت: لا ردي عليه يا حياة شوفي عايز ايه ..

وانا زي ماكون مصدقت ورديت

حياه: الحمد لله وانت؟

ادم: الحمد لله .. بقولك كنت عايز اوريكي حاجه مهمه جدا .. بعدها حتعذريني في اللي عملته معاكي يوم النادي

حياه: حاجه ايه؟

ادم: لما تشوفيها حتعرفي

حياه: وعايز تورهالي امتى

ادم: دلوقتي ياريت

حياه: دلوقتي؟ 

الساعه كانت تسعه بليل وانا مش متعوده انزل لوحدي خالص غير الصبح  وقت الكليه و بروح بتاكسي .. وهوه كمل كلامه

ادم: ايوه انا جنب بيتكم

ووصفلي شارع قريب مننا .. مرحتهوش قبل كده لوحدي بس ميتوههش .. وانا احترت اعمل ايه بس الصوت قال لي

الصوت: انزلي وشوفي يا حياه .. 

حياه: طب وماما اكيد مش حترضى

الصوت: لا قليلها ان نهى قالتلك انها معديه قريب من البيت وانك وحتنزلي تسلمي عليها بسرعه وتطلعي

رديت على ادم بالموافقه واكدت عليه اني مش عايزه اتاخر هما بالكتير خمس دقايق .. وطلعت من الاوضه ورحت قلت لماما زي مالصوت قال لي 

ماما: طب متقولي لنهى تطلع

حياه: قلتلها واتكسفت ومرضتش خالص .. انا يدوب حسلم عليها وحقولها بردك تطلع معايا

ماما: ماشي بس متتاخريش

حياه: لا هما بس خمس دقايق بالكتير ان شاء الله

ونزلت رحت الشارع اللي قال لي عليه ..اول الشارع كان ضلمه . وفاضي خالص.. كنت خايفه قوي وانا داخلاه .. بقدم رجل وااخر التانيه .. "ادم" قال لي قدام صيدليه "نعيم" .. فضلت ادور عليها و قلت لنفسي اكيد الصيدليه دي قافله اصل الدنيا ضلمه قوي .. فضلت امشي اكتر والظلمه بتزيد .. وكل متزيد بيزيد معاها شعوري للرجوع .. السكون مسيطر على الطريق والخوف ماليني .. فجأه سمعت صوت .. بيبي بيعيط .. حاولت اركز لمكان الصوت .. لقيت بيبي ملفوف بغطا .. كان نايم على الارض قدام بيت .. بصيت حواليا كتير ملقتش اي حد .. قلت ممكن مامته سابته وبتعمل حاجه بس الاحتمال ده ابعد ما يكون .. مين حيسيب ابنه لوحده كده وفي الضلمه .. حاولت اقنع نفسي اني اتجاهل واكمل طريقي .. حاولت اكمل بس صوته كان في وداني طول الوقت .. وصلت لاخر الشارع بالعافيه.. وكان لسه بيعيط .. وملقتش الصيدليه .. ولا لقيت "ادم" .. بس قررت وقتها ارجع اجيب البيبي .. رجعت تاني رغم الخوف والقلق من الضلمه واني لوحدي هناك .. لغايه موصلتله .. وشلته .. اول ممسكته سكت .. حضنته جامد وكملت الشارع .. اول مطلعت من الشارع ارتحت .. وكل مببص للبيبي بيرجعلي القلق .. مين يسيب ملاك بريء كده .. وحاعمل ليه ايه دلوقتي .. واللي عملته ده صح ول غلط .. روحت البيت وفتحت .. لقيت ام شوقي قدامي .. كانت فاتحه درج البوفيه اللي بنحط فيه الفلوس وماسكه فلوس كتير ... بصيت ليها باستغراب مش متعودة تتعامل مع الفلوس بتاعتنا كده من نفسها .. وهيه شكلها فهمت نظراتي قالت لي وقتها ..

ام شوقي: ماما قالتلي اجيب لها الفلوس دي

حياه: هيه ماما فين؟

ام شوقي: في اوضتها مع بباكي يا حياه

رحت على اوضتي  بسرعه قبل ميشوفوني ويشوفو البيبي معايا .. ام شوقي مسألتنيش عن البيبي و قلت كويس ..دخلت اوضتي وقفلت الباب .. وسبت البيبي ينام على السرير .. وقعدت جنبه آخد نفسي .. لقيت المج بيقول لي

الصوت: مين ده يا حياة؟

حياه: ماعرفش ..  بيبي لقيته قدام بيت في الشارع المقطوع اللي قال لي عليه ادم 

الصوت: شارع مقطوع .. يا نهار.. طب وايه الحاجه اللي كان عايز يورهالك؟

حياه: مجاش اساسا

الصوت: الراجل ده مريب .. اعمليله بلوك اجسن

وقتها قلت ميمكن كان حيوريني البيبي ده .. يمكن ابنه .. يمكن كان متجور نيفين من ورا مامتها وده ابنهم مثلا .. لقيت المج بيرد

الصوت: ايه التخاريف دي اكيد لاء 

حياه: عندك حق متجيش كده خالص

الصوت: وحتعملي ايه في البيبي

حياه: مش عارفه حفكر لغايه بكره اقولهم ايه الا لو شافوه قبلها حابقى في مصببه ..

الصوت: وماله نفكر سوا

حياة مع المجهول - الجزء الأول

اتبرجلت قوي لما شفت الاضافة .. ايه اللي فكره بيا وليه اضافة كان باين قوي انه مش موافق .. معرفش ليه عطشت قوي وقتها .. اخدت ازازه الماية وملقتش كوبايتي اصب فيها الماية .. فكرت وقتها في مج تيته القديم .. صبيت فيه الماية وبدأت اشرب .. وانا بشرب فكرت في تيته وقد ايه كان نفسي تبقى معايا اناقشها اعمل ايه وقتها ..

بعد مشربت نص الكباية وسبتها .. سمعت صوت بيقول لي

الصوت: اسألي مامتك توافقي ولا لاء .. احكيلها

اتخضيت قوي .. بلعت ريقي بصعوبه قوي .. فضلت ابص حواليا ملقتش اي حد ..

الصوت: متقلقيش مني ..

وهوه بيتكلم وقتها شفته .. كان بيحرك بقه وعينه متجهه عليا ..

انا حرجع بالزمن واحكي حكايتي من الأول .. نهايتها كانت اغرب من بدايتها ..

انك تلاقي حد قريب منك .. يفهمك من غير ما تكلمه .. من نظره ليك يكون قاريك .. بيعرف انك متضايق ولا فرحان .. بيعرف يقول لك الكلام اللي حيريحك  .. أو النصيحه اللي حتقنعك بسهوله  و في نفس الوقت تفيدك .. كل ده نعمه كبيره من عند ربنا .. رزق كبير .. ربنا رزقني بالرزق ده لما خلى جدتي تبقى "تيته فاطمه"

تيته فاطمه تبقى مامت ماما "سعاد"  .. هيه ساكنه في العماره اللي قصادنا .. بس اغلب الوقت قاعدة معانا من يوم ما انا اتولدت .. كانت اقرب صاحبه ليا .. اقرب من ماما نفسها .. كانت فاهماني على طول زي ما تكون بتقرى افكاري  وملامحي .. كنت باستشيرها في كل حاجه في حياتي .. وجودها معانا دايما .. ونزول ماما وبابا كتير للشغل .. وعدم وجود اخوات ليا .. كل ده كان مخلينا انا وتيته قريبين من بعض جدا ..

انا "حياه" .. عيلتي ميسورة الحال او فوق الميسورة بشوية .. أقدر أقول على نفسي مرفهه .. مش بساعد في اي حاجة في شغل البيت .. ولا عمايل الأكل  .. ولا غسل المواعين .. ولا ليا علاقه بكل ده  .. داده أم شوقي هيه اللي بتعمل لينا كل حاجه .. هيه دايما مع تيته عشان تخدمها ولما تيته بتيجي عندنا بردك بتيجي معاها .. واوقات بردك بيباتوا عندنا .. أم شوفي بتساعد ماما في شغل البيت وبتشوف طلباتنا .. وتقريبا بقت واحده مننا ..    

في يوم تيته كانت بايته عندنا .. تعبت مره واحده بليل ..  وطلبوا ليها الاسعاف .. كان من اصعب ايام حياتي .. مكنتش فاهمه ليه صحيت من النوم بليل بتتألم ومحدش عارف عندها ايه .. لما وصلنا المستشفى دخلوها العنايه المركزه وقالوا وجودكم مالهوش لازمه  .. ماما فضلت قاعده في المستشفى طول الليل مع ام شوفي .. وبابا يومها روحني ورجع تاني لماما .. أنا صحيت بعدها بيوم الصبح متاخره  عن معاد الزياره للاسف راحت عليا نومه. .. زعلت قوي.. رحت افطر ملقتش عيش في البيت .. رحت اعمل قهوه فارت مني بس شربتها بردك .. متخيلش يومي الصبح من غير القهوه .. كلمت ماما في التليفون .. بابا اللي رد عليا طمني وقالي اروحلهم  .. كنا في عز الشتا .. كانت اجازه نص السنه في الكليه وانا كنت فاضيه .. كنت سقعانه قوي رغم الحاجات الكتير اللي لابساها .. وصلت المستشفى لقيت قرايب لينا كتير واقفين .. لقيتهم كلهم لابسين اسود او غامق .. لما قربت لماما لقيتها بتعيط .. حضتنتي جامد وقالتلي ان تيته ماتت ..

يمكن كانت اصعب لحظه عدت عليا .. متوقعتش انها تعبت للدرجة دي .. بابا كان بيطمني عشان اعرف اجي لوحدي من غير ما أبقي عارفه .. من صدمتي معيطتش ..انا كنت مذهوله من نفسي جدا راحت فين الدموع اللي من اقل حاجة بتنزل من عنيا .. كان معايا مصحف معرفش مين ادهولي هناك .. فضلت اقرى كتير منه .. ومش مركزه في اي حاجة ولا اي حد هناك .. عماله اقرى منه وادعيلها ربنا يثيبتها ويغفر لها ويسامحها ..

أمي عندها تلات اخوات بنات وأخين .. خالاتي وخيلاني .. للأسف خالو عماد كان مسافر امريكا وقتها .. هوه عايش هناك .. ومقدرش ينزل يحضر الدفن و العزا .. قد ايه كلنا اتضايقنا .. قد ايه  تيته لو شايفانا كان زمانها مقهوره .. ربنا يرحمك يا تيته ..

 مرت ايام كتير بعد وفاه تيته .. وانا بدأت اتعود بالتدريج على فراقها .. بس كنت بحتاجها كتير معايا .. بعد وفاتها بقت ام شوقي معانا على طول .. بقت تعمل لي كل يوم الصبح  القهوه و اخيرا بقيت باشربها على طول و من غير ماتفور مني ..

بعد ست شهور من وفاه تيته اتصلت طنط "ليلى" قريبتنا بماما.. وانا معدية جنب ماما سمعتها وهيه بتتكلم في التليفون .. وكلامها جذبني ..

ماما: هيه حياه كده فاضلها سنه وتتخرج باذن الله

...

ماما: طب وهوه عنده شقه ولا ناوي يتجوز مع مامته؟

..

ماما: بس فرق السن مش كده كبير يا ليلى؟

...

ماما: لا خليها في النادي بلاش البيت يبقوا ييجوا لما التعارف يحصل ويحصل نصيب باذن الله ايه رايك؟

...

ماما: لا متقلقيش محمود مش حيعارض بس بردك حقوله وااكد عليكي

...

ماما: ماشي حلو لما ااكد عليكي ردي عليهم

وكملوا بعدها كلام في مواضيع تانيه ملهاش علاقه بيا .. فضلت بشوق مستنيه ماما تخلص المكالمه عشان اسألها .. وأول مقفلت مستنتهاش تكلمني وسألتها أنا على طول ...

حياه: هاه انتوا كنتوا بتتكلموا عني في ايه بقى ؟

ماما بصتلي وقالتلي في حيرة

ماما: مركزة انت معانا كويس .. دي جايبالك عريس زي ما سمعتي .. ابن اخوا جوزها بيدور على عروسة وقالتله عليكي وبتاخد رأينا عشان تتعرفوا على بعض ..

حياة: وعرفتي عنه ايه؟

ماما: مهندس ديكور .. بيشتغل وبتشكر فيه بيصلي ومحترم وسيرته كويسه ..

حسيت ان ماما مش مبسوطه

حياة: في ايه مالك يا ماما مش كل شوية تقولي نفسي افرح بيكي في ايه ده عريس ايه اللي ضايقك كده

ماما: مش عارفه ده اكبر منك بيجي 14 سنه ..

حياة:هوه فرق السن كبير بس ايه رايك نشوف مش حنخسر حاجة

ماما: كمان مستغربه متقدمش ليه لنفين بنتها مهي اكبر منك كمان.

حياة: ممممم .. يمكن هوه مجبش سيرتها وهيه اتكسفت تقول له ما بنتي موجودة

ماما: ممكن بردك مانا كان بيلعب في بقي اسألها وميتجوزش نيفين ليه بس سكت عشان كده.. اللي يقلق انه يبقى طلب بنتها ورفضت ..

حياة: طب وايه حنقابله ولا ايه

ماما: استني لما اشوف باباكي حيقول ايه

فضلت مستنيه بابا يرجع من الشغل ولما رجع استنيت ماما تحكيله محكتش حاجة .. بعدها بشويه وأنا داخلة اوضتي سمعتها بتفتح معاه الموضوع فهمت انها عايزه تكلموا وانا مش قاعدة .. ففضلت سايبه الباب مفتوح عشان اسمع من عندي

بابا: طب ليكون اتجوز قبل كده او متجوز اساسا وهيه مش قايلالك؟

ماما: مفكرتش في حاجة زي كده

بابا: اتاكدي منها بردك قبل المقابله دي .. وشوفوه لو مش متجوز يمكن يحصل نصيب مين عارف

ماما: خلاص انا حتصل بكره أسألها و نتفق ان شاء الله

بعد مسمعت ماما فرحت قوي .. واتوترت قوي .. بعدها بيوم ماما جت قالتلي

ماما: بكرة ان شاء الله حنتقابل مع العريس اللي جايباه طنط ليلى

حياة: هوه ملهوش اسم العريس ده

ماما: اسمه "ادم"

حياة: وبابا وافق؟

ماما: اه بابا كان خايف يكون متجوز بس انا اتأكدت من طنط ليلى .. هوه كان في السعودية فتره ولسه راجع عايز يعيش هنا ولسه بيدور على عروسه

حياة: هوه حد بيسافر بره ويرجع غريبة

ماما: لما نشوفه بقى نبقى نسأله اهو نلاقي حاجة نتكلم فيها

حياة:ومين جاي معانا

ماما: انا وانت وطنط ليلى بس .. هوه تقريبا حييجي لوحده او مع مامته

حياة: ونيفين جاية ولا حاجة؟

ماما: لا طبعا تيجي ازاي دي مقابله وكده مينفعش تيجي

حياة: يعني سألتي طنط ليلى

ماما: من غير ما أسألها اكيد مش حتيجي يعني مش محتاجة سؤال

لما رجعت اوضتي فضلت افكر المفروض اقول ايه واعمل ايه .. كنت قلقانه قوي .. انا مليش اي اختلاط مع الاولاد عموما .. حتى البنات انا مليش اصحاب كتير ..

بعدها بيوم فطرت الصبح وشربت القهوه من ايد ام شوقي ..   فكرت حلبس ايه وجهزت كل حاجة لمقابله المجهول .. "أدم" .. وبعد ماتغدينا رحنا النادي انا وماما على المعاد قعدنا قرب الباب عشان نشوفهم لما ييجوا .. وفضلنا في انتظارهم .. وانا بين الفرح و الشوق والقلق .. متلغبطه وعايزه حد يقولي اعمل ايه .. فينك يا تيته ..

الوقت كان بيعيدي وهما مش بييجوا .. ماما مكانتش عايزه تكلم طنط ليلى بتقلي لا هما اللي اتاخروا عيب المفروض يتصلوا يعتذروا .. بعد معدت ساعه كل المشاعر اللي كانت جوايا  كانت اتحولت لملل وضيق .. وقتها طنط ليلى اتصلت ..

ماما: السلام عليكم

...

ماما: احنا هنا من بدري

...

ماما: احنا جنب الباب ازاي مشفناكمش لما جيتوا

...

ماما: طيب احنا حنستناكم

وقفلت ماما وقالتلي

ماما: دول جهم قبل المعاد بساعه وقاعدين فوق مستنيين

حياه: شفتي ظلمناهم ازاي يا ماما

ماما: بقولك يا حياه قبل ما يجوا .. متفتحيش موضوع تيته وانك زعلانه وكده بلاش القعدة تقلب نكد وزعل

استغربت كلام ماما بس وافقتها

لقيت ماما بتبص ورايا بابتسامه ففهمت انهم قربوا وجايين من ورايا .. عينيها بتتحرك مع حركتهم وانا مش عايزه ابص ورا من قلقي .. لحد ما وصلت طنط ليلى سمعتها بتقول

طنط ليلى: السلام عليكم .. ياه اخيرا انا فكرتكم مش جايين

ماما وقفت علشان تسلم وانا كمان وقفت

ماما: لا احنا هنا من بدري

سلمت طنط ليلى عليا انا وماما .. وكان جنبها "ادم" .. كنت محروجه قوي وانا ببصله .. بس لازم اشوفه عشان اتعرف عليه .. قال السلام عليكم وقعد على طول ..

قبل ماقعد لقيت نيفين كانت جايه وراهم .. قالتلي ازيك وسلمت عليا .. انا اتضايقت قوي لما شفتها .. سلمت عليها ..وهيه بعدها راحت قعدت جنبهم .. كلهم كان عينهم عليا وانا بسلم عليها .. واضح ان خنقتني كانت باينه عليا قوي ..مقدرتش اداري زعلي من وجودها .. بصوا لماما بعدها كأنهم عايزنها تعاتبني على طريقتي لمعامله نيفين .. بس حتى ماما كانت متضايقه قوي كان باين عليها .. بصت للأرض ومقالتليش ولا قالت لنفين اي حاجة .. وشكل طنط ليلى فهمت انا متضايقين من وجود نيفين واتضايقت هيا كمان مننا .. فضلت ماما وطنط ليلى يتكلموا من غير نفس .. شوية وطنط ليلى قالت لماما

ليلى: تعالي معايا عايزه اوريكي المعرض اللي هنا ..

قامت هيه وماما ونيفين راحت معاهم وسابوني مع "ادم" .. طبعا كنت فاهمه انهم عايزين يسيبونا نتعرف على بعض ..

فضلنا ساكتين .. كان قاعد طلع موبايله وفضل يلعب عليه .. كانت اكتر لحظات الصمت القاتله .. تصريح واضح وصريح بالرفض .. كان الاختناق اقل من شعوري وقتها .. فضلت مستنياه يفتح معايا اي كلام مفتحش ..

فكرت اكلم ماما ترجع بس لقيت نيفين راجعه لوحدها وقعدت جنب "ادم"

نيفين: انت مجيتيش معانا ليه نتفرج على المعرض يا حياه؟

اتحرجت من سؤالها قوي مهيه عارفه اننا جايين نتعرف اكيد ولا مامتها مقالتلهاش؟ .. بصتلها ومش عارفه اقولها ايه .. بعدها قلتلها

حياة: انت سيبتيهم ورجعتي ليه مفيش حاجة عجبتك؟

وقتها لقيت "ادم" بصلي .. قلت يمكن عشان دي اول جمله اقولها وهوه قاعد .. قلت اخيرا .. بس رجع بص للموبايل .. جه وقتها احساس جوايا ان هوه ونيفين بينهم حاجة ومش قايلين لمامتها ..

نيفين: لا معجبنيش حاجة

طلعت موبايلي وقتها وكلمت ماما

حياه: ماما انتوا فين .. انا عايزه اجي اشوف المعرض معاكم

ماما: ايه؟ طب احنا راجعين

رجعت ماما وطنط ليلى وسلمنا عليهم وروحنا انا وماما وسبناهم في النادي

وانا في الطريق قلت لماما

حياه: ده شكل بينه وبين نيفين حاجة ما شوفتيش اهي جت وكمان مكنتش عايزه تسيبنا سوا

ماما كانت متضايقه قوي

ماما: معلش يا حياه كأن مفيش حاجة حصلت .. متشغليش بالك بالموضوع كانه محصلش خالص

حياة: طب جه ليه وهوه عارف انه مش حيكمل من الأول هوه بيتسلى ايه الناس دي

ماما كانت متضايقه بس مقالتش اي كلمه عليهم .. كانت بتحاول تهديني كان نفسي احس انها متضايقه منهم زيي .. كان نفسي تبقى تيته جنبي دلوقتي هيه الوحيدة اللي بتريحني

روحنا البيت وحاولت انسى الموضوع .. بعد كام يوم جت ماما مره تقلي

ماما: احنا حنروح نفضي الشقه بتاعت تيته النهارده

حياه: طب يا ماما ابقي جيبيلي معاكي حاجه من حاجات تيته اخليها معايا .. اي حاجه كانت قريبه منها وبتمسكها كتير

ماما : طيب حشوف ان شاء الله ..

فضلت متشوقه اعرف ماما حتجيب ايه.. كان نفسي في اي حاجة تبقى معايا فعلا تبقى ذكرى لتيته على طول

ولما ماما رجعت أول مدخلت من باب الشقه روحتلها على طول .. قبل ماسألها "جبتي لي ايه" حسيتها متضايقة فسألت عنها الأول ..

حياه: مالك يا ماما .. شكلك متضايق؟

ماما: مفيش يا حياة .. كلنا بس متضايقين من خالك انه لسه منزلش ..

حياه: معلش يا ماما .. مش عارفه اقولك ايه هوه غريب فعلا .. بس تيته على طول عارفه تصرفاته معاها ومتحمله وحبيبتي مكنش بتشتكي ..

ماما: لقيناها سيبالنا جواب .. كاتبه عليه من بره افتحوه بعد مموت .. لما تتجمعوا سوا .. لما كلكم تبقوا مع بعض افتحوه يا ولادي .. مش عارفه قالت لمين يكتب الجواب ده ..

حياه: يمكن ام شوقي او حد من عيالها ..

ماما: يمكن .. لما تيجي ام شوقي حاسألها ..

حياه: وطلع فيه ايه الجواب ده؟

ماما:لا هيه موصيانا نبقى سوا كلنا  .. فحنستنى خالك عماد لما يرجع بالسلامة و نفتحه وقتها ان شاء الله

حياه: ان شاء الله .. طب هاه جيبتي لي ايه من حاجات تيته؟

لقيت ماما طلعت مج كانت تيته بتحطه عندها كديكور كده على البوفيه .. كان منحوت عليه زي حيوان كده شكله خروف معرفش ده عباره عن ايه ..

حياة: ايه ده يا ماما ؟ ده مكنتش تيته بتشرب فيه حتى ده كان منظر كده حطاه انا عايزه حاجه بتستخدمها

ماما: انا لما رحت لقيتهم قسمو اغلب الحاجة ملقتلكيش غير ده

اخدتوا منها وحاولت ابينلها قد ايه اتضايقت فعلا .. دخلت اوضتي حطيته جنبي على الكوميدينو .. كنت ببصله باستياء كان نفسي في حاجة احسن ..

بعد كام يوم وانا قاعده في اوضتي على المكتب وفاتحه اللاب .. كنت فاتحه الفيس بوك .. لقيت اضافة من حد .. فتحت طلب الاضافة لقيت صورته واسمه قدامي .. "ادم اسماعيل" ..

اتبرجلت قوي لما شفت الاضافة .. ايه اللي فكره بيا وليه اضافة كان باين قوي انه مش موافق .. معرفش ليه عطشت قوي وقتها .. اخدت ازازه الماية وملقتش كوبايتي اصب فيها الماية .. فكرت وقتها في مج تيته القديم .. صبيت فيه الماية وبدأت اشرب .. وانا بشرب فكرت في تيته وقد ايه كان نفسي تبقى معايا اناقشها اعمل ايه وقتها ..

بعد مشربت نص الكباية وسبتها .. سمعت صوت بيقول لي

الصوت: اسألي مامتك توافقي ولا لاء .. احكيلها

اتخضيت قوي .. بلعت ريقي بصعوبه قوي .. فضلت ابص حواليا ملقتش اي حد ..

الصوت: متقلقيش مني ..

وهوه بيتكلم وقتها شفته .. كان بيحرك بقه وعينه متجهه عليا .. منحوته الحيوان اللي على المج ..