حياة مع المجهول - الجزء الثالث

الصوت: وحتعملي ايه في البيبي

حياه: مش عارفه حفكر لغايه بكره اقولهم ايه الا لو شافوه قبلها حابقى في مصيبه ..

الصوت: وماله نفكر سوا

حاولت افكر كتير في أي طريقة بس موصلتش  لأي حاجة .. حتى المج موصلش لأي حاجة ينفع تتقال لهم .. كل شوية ابص على البيبي النايم ببراءة على السرير وخايفه أكون غلطت لما اخدته وتكون مامته دايخة عليه وقلبها واجعها من بعاده ..مجاليش نوم طول الليل وانا بفكر .. وكنت قلقانة حد يصحى من صوت عياطة وييجي يسألني عنه .. ..

بعدها بيوم الصبح طلعت من اوضتي .. لقيت ماما في المطبخ .. استنيتها تسألني عن عياط البيبي .. بس ملقتهاش مركزه معايا خالص واضح انها مسمعتهوش .. كانت بتحضر الفطار ..

حياة: صباح الخير يا ماما ..

ماما : صباح النور يا حبيبتي .. 

حياة: امال فين ام شوقي؟

ماما:نزلت امبارح بليل باتت عند ابنها .. زمانها على وصول متفقين تيجي من بدري

حياة: كويس حستناها تعمل لي القهوه مش بتطلع معايا حلوه

ماما: خلاص حاعملهالك انا بس بعد الفطار .. وبعد متشربي القهوه ان شاء الله عايزين انا وبابا نتكلم معاكي شوية ..

قلقت من جملتها .. هما سمعوا عياط البيبي ولا ايه .. بس استنوا ليه كل ده؟

حياة: تتكلموا معايا في ايه؟

ماما: لا ده موضوع كبير ومحتاج قاعدة .. بعد القهوه تكوني مفوقه كده ونتكلم ..

رحنا فطرنا .. واحنا بنفطر ام شوقي جت .. وانا طول الوقت دماغي ما بين حيقلولي ايه وانا اقولهم ايه على البيبي .. ومستغربه اني مش سامعه ليه أي صوت ..

بعد الفطار دخلت الاوضة بتاعتي .. ملقتش البيبي على السرير .. سألت المج ..

حياة: هوه راح فين؟ فين البيبي؟؟

الصوت: ممم غريبة .. مش عارفه يا حياة .. انا  مبكنش موجودة وانت مش في الاوضة ..

اتوترت قوي .. يكون حد مثلا دخل الاوضة و اخده .. يمكن ماما وبابا شافوه وحيسألوني عنه .. طلعت على صوت ماما بتنادي عليا بصوت يقرب للزعيق عن انها بتنادي ..

ماما: حياة تعالي هنا ..

طلعت لقيت بابا وماما في الصاله وماما باين عليها متضايقه قوي .. وقتها اتأكدت انها حتسألني على البيبي .. بس لقيت الموضوع غير ده خالص ..

ماما: فين الالفين جنيه اللي كانوا في الدرج هنا؟

حياة: ماعرفش انا مجتش جنب الدرج ده .. افتكر ام شوقي امبارح اخدت فلوس منه تدهالك

كانت ام شوقي معدية وأول مجبت سيرتها وقفت .. استغربت قوي وقالت

ام شوقي: انا!! لا محصلش خالص امتى ده؟

حياة: امبارح بليل لما طلعت من تحت .. مش كان معاكي فلوس من الدرج وقولتيلي ماما عايزاها؟

ام شوقي ردت وهيه متضايقة جدا : لا محصلش .. انا عمري ما مديت ايدي على فلوس..

ماما: كفاية يا حياة .. أم شوقي انا اسفة لو سمحتي سيبينا مع حياة شوية

استغربت رد فعل ماما قوي .. ازاي تصدقها وتكذبني .. ازاي بسهوله قوي كده

ماما: وفين الذهب اللي كان في اوضتي يا حياة؟ ام شوقي بردك اللي اخدته؟

حياة: ذهب ايه؟ ماعرفش حاجة عن الموضوع ده ..

ماما: ام شوقي شافتك لما اخدتيه من اوضتي وقالتلي ..

حياة: وصدقتي ام شوقي اني سرقت وبتكذبيني أنا !! ازاي

كنت مذهوله ومستغربة ومش فاهمه ازاي كده .. كانت صعبانة عليا نفسي قوي ..

بابا وقتها اتدخل وقال لماما

بابا: براحة شوية يا سعاد .. انت عارفه انها تعبانه

حياة باستغراب: مين اللي تعبان؟

بابا: انا كنت عايز اكلمك بعد شوية انا وماما بس لازم نتكلم دلوقتي احسن 

ماما وقتها كانت بدأت تهدى شوية .. حسيت من نظراتها اني صعبت عليها فجأه من بعد مكانت متعصبه .. 

بابا: اقعدوا يا جماعه خلينا نتكلم واحنا قاعدين

رحنا قعدنا على الانتريه مع بعض وبدأت أصعب مواجهه ليا

بابا: احنا ملاحظين يا حياة انك تعبانة من يوم وفاة جدتك .. نفسيتك اتأثرت جامد بعدها .. 

بابا: احنا سألنا دكتور وقالنا الأحسن نصارحك بكل حاجة .. في الأول مش حتصدقينا اكيد .. ومش حتقتنعي بكلامنا .. بس احنا معاكي يا حبيبتي ..

كان بيسكت بين الجمل كأنه مش عارف يتكلم .. وكلامه كان بيوترني اكتر .. لما شافوا البيبي فهموا ايه بالظبط .. ولا قصده سمعوني وانا بكلم المج وفكروني بكلم نفسي مثلا !!

بابا: بعد ما جدتك اتوفت .. بدأتي تبصي بصات غريبة شوية في الأول يا حياة .. كان الموضوع بسيط لغاية مجه يوم مرحتي النادي مع مامتك عشان تشوفي العريس .. العريس اللي كانت جايباه طنط ليلى

حياة: ايه اللي حصل يومها يا بابا؟؟

بابا: قوليلها انت يا سعاد ما أنت اللي كنت معاها هناك

ماما:لما جهم كنتي بتعملي حاجات غريبة .. مكنتش فاهمه بتعمليها ليه .. بس لما مشوا وقلتيلي على نفين فهمت ..

حياة: فهمتي ايه يا ماما انا مش فاهمه حاجة ..

ماما: حياة لازم تعرفي ان نفين .. ان نفين مكنتش موجوده يومها ..

ماما سكتت شوية .. وانا كان زي ميكون حد ضربني على دماغي من الجمله .. بعدها كملت 

ماما: بعد مجت ليلى انتي سلمتي عليها وبعدها كلمتي حد مش موجود وفضلتي باصة عليه .. انا مكنتش عارفه اعمل ايه ولا اقولك ايه .. وكل شويه كنت بتبصي للفراغ بصات غريبه .. ليلى وادم لاحظوا ده بردك بس محدش سألني .. كانت نظراتهم ليكي كفيله .. ليلى سألتني واحنا في المعرض وقلتلها ان نفسيتك تعبانة شوية من بعد وفاة جدتك .. وقتها قالتلي لازم تشوفي دكتور ..وواحنا مروحين بردك سلمتي على حد مش موجود .. مكنتش عارفه الصح اعمل ايه وقتها .. لما جيت وسألنا دكتور انا وبابا قال لو اتكرر الاحسن نقولك .. ونواجهك ..

افتكرت وقتها رد فعلهم لما سلمت على نيفين .. كلهم بصولي باستغراب واتضايقوا .. انا فسرت وقتها استغرابهم غلط .. فكرتهم متضايقين اني عاملت نفين وحش .. افتكرت ادم اللي مبصليش غير لما كلمت نفين لما ماما وطنط ليلى راحوا يشوفوا المعرض.. و ماما فعلا مسلمتش على نفين لما وصلوا ولا واحنا ماشيين ..

بلعت ريقي وسكتت .. وفضلت افكر بيني وبين نفسي .. طب المج .. اكيد انا اتجننت .. اكيد عندي مرض بيخليني اشوف الحاجات دي ..

بابا: انا عارف انه صعب تصدقي بس ده اللي حصل يا بنتي

حياة: مصدقة يا بابا .. حتكذبوا عليا ليه .. بس احكولي كل حاجة ..

ماما: بقالك فتره قافله على نفسك باب الاوضة .. و بتكلمي نفسك .. من يومين جت ام شوقي قالتلي انك اخدتي الذهب من اوضتي .. استنيتك تقولي ما قولتيش .. وامبارح بليل كمان لما قلتيلي على إضافة ادم ليكي ..

حياة: ايه اللي حصل وقتها؟؟

ماما: شاورتيلي على بنت بعتالك إضافة اسمها "نغم" وحاطة صورتها وقلتيلي اهو ادم ده اسمه ودي صورته

وقتها مبقتش فاهمه أي حاجة .. انا بتخيل كل ده .. يعني ايه .. مفيش نفين .. ادم ما كلمنيش .. المج اكيد خيالي .. ومش بعيد البيبي كمان كان وهم .. وذهب ايه اللي بتقول عليه .. وليه شفت ام شوقي بتاخد فلوس وهيه مخدتش حاجة؟

ماما: انا عارفه انك مش حتصدقينا يا بنتي

حياة: لا مصدقاكم يا ماما .. بس اللي مش فاهماه اني مش فاكره خالص موضوع الذهب ده .. وليه اشوف ام شوقي بتاخد الفلوس مش انا وحابق وديتها فين ..

ماما: طب تعالي نشوف في اوضتك يمكن حطتيهم في حته هناك ..

دخلنا كلنا الاوضة ودورنا كويس .. ملقيناش أي حاجة منهم .. كل شوية ابص للمج الثابت المحطوط وهوه مليان ماية .. طلعنا تاني من الاوضة ..