شوية وسألت حنان .. هوه عمرو كان موجود يومها
.. بصت لأمل وقتها وبعدها قالتلي اه كان جه بدري يومها .. انا اساسا مرضتش اديه
الابره وشكله غريب كده غير عشان دكتور عمرو كان هنا .. سالتها وقولتيله على الوشم
؟ .. ردت قالتلي "اه قولتله هوه وامل على الوشم ده .. و دكتور عمرو قالي اكبر
دماغي .."
وقتها بس عرفت ان عمرو وراه حاجة .. مش طبيعي
كده خالص اللي بيحصل .. وانا سرحان كنت حاسس ان امل باصه عليا كتير .. سالتها
"في حاجة يا امل" .. قالتلي لا مفيش حاجة .. بدأت اشك ان ممكن حد فيهم
يعرف حاجة وانا مش فاهم ..
عمرو جه سلم علينا والبنات مشيوا .. انا
محكتلهوش على رساله امبارح ولا اني شفته ولا كلام حنان وامل .. فضلت اشتغل في صمت
تام .. كان كل شوية بيكلمني وانا برد على قد السؤال ..
في النص فاجئني بسؤاله .. "انت ما
قولتليش ليه على الرساله اللي جتلك امبارح" .. قلتله "رساله ايه؟"
.. قالي الرساله اللي كان مكتوب فيها لو عايز تعرف سر الوشم تروح العنوان! ...
اتصدمت لما قال لي مكنتش متوقع خالص ..
قولتله انت عرفت ازاي؟ .. فضل يضحك وبعدها قال لي "عشان انا اللي
باعتها" .. قلتله "انت؟ وبعتها ليه؟" .. قالي كنت باعمل فيك مقلب
.. فاكر الراجل اللي جه ومكتوب في ايده وشم "تجربه 4" وقلتلك انتحر ..
قلتله اه طبعا فاكره .. قالي ده مكنش وشم دي كانت رسمه كده رسمناها على دراعه عشان
اهزر معاك وكنت باعتلك الرساله تيجي عشان نخوفك بس انت مجتش .. وكمل ضحك ...
انا فضلت باصصله ومذهول من اللي بيقولوا
وقولتله .. "مانا شفتكم يومها" .. قالي "شوفتنا؟" .. قولتله
"اه وانتوا نازلين سوا من العماره واستغربت" .. قالي "وما قولتليش
ليه عشان تفهم؟" .. مردتش عليه .. شوية ولقيته بيضحك وقال لي "تلاقيك
فكرتني عارف اللي قتل ماهر " وقعد يضحك شوية ..
انا مكنتش عارف اصدقه عشان الموضوع اللي
قالته حنان .. انا لما سألت عمرو قبل كده عن الوشم قال لي ماشوفتش اي وشم فيه كلمه
"تجربة" دي ولا سمعت عن حد حاطط وشم عليه الكلمة دي .. ولسه حنان حاكيه
انها قالتله عن واحد دخل وحاطط وشم "تجربة 1" ..
بعدها بيوم الظهر لقيت امل بتتصل بيا .. رديت
عليها بقلق .. اصل انا من نظراتها امبارح حسيتها مع عمرو وانا مش فاهم .. قالتلي
"انا عايزه اقولك حاجة عن موضوع الوشم اللي سألتنا عليه امبارح" ..
قلتلها "خير" .. كملت وقالتلي "انا فاكرة كويس يوم مجه الراجل اللي
عليه وشم تجربه 1 ..اللي قالتلك عنه حنان .. الوشم لفت نظري جدا انا كمان .. بعد
ممشى بشوية انا وقعت ورق من بتاع دكتور عمرو بالغلط .. وكان في ورقة مرسوم فيها
نفس الوشم بالظبط .. انا استغربت وقتها .. وبعدها باسبوع تقريبا جه واحد تاني
اديته حقنه وكان عليه وشم مكتوب عليه تجربه 2 بس انا ماقولتش عليه لحد" ..
قولتلها "وبتقليلي انا ليه؟" .. قالتلي "انا قلقانه من الموضوع ده
ماعرفش ليه" ..قفلنا مع بعض وبقيت مش عارف اثق فيها ولا يكون عمرو باعتها
تكلمني ..
نفس اليوم قبل مروح الشغل بشوية لقيت حنان
بتتصل بيا .. قلت لنفسي ايه الحكاية رديت عليها قالتلي ياريت تيجي عايزاك ضروري ..
رحت الصيدليه ملقتش امل هناك .. مكنش موجود غير حنان .. سألتها عن سبب التليفون
واني اروح بدري .. قالتلي "دكتور عمرو جه من شويه .. سألني لو قلتلك على
الراجل اللي حاطط الوشم .. وانا قلت لدكتور عمرو اني قلتلك عادي .. قالتلي حسيت
دكتور عمرو زعل قوي و شخط فيا جامد .. انا مش فاهمه ايه مشكله الراجل بتاع الوشم
ده؟ ايه مشكله اني حكيتلك حاجة كده .. قلتلها "مفيش مشاكل" .. لما لقيت
الوقت قرب على معاد شغلي فضلت قاعد معاها شوية .. سألتها عن "امل"
قالتلي تعبت شوية ومشت بدري ..
عمرو اتاخر .. قلت اتصل بيه .. بامسك
الموبايل لقيت موبايلي مقفول"
استغربت قوي قلت فصل امتى .. فتحته لقيته مشحون عادي استغربت و قبل ماتصل بعمرو .. لقيت
"يسرا" بتتصل بيا ..
قالتلي "ايه يا ياسين قافل موبايلك ليه
كلمتك كتير ؟.". قلتلها "مش
عارف شكله فصل لوحده في حاجة ولا ايه؟ ".. قالتلي "اصل عمرو جه اول مانت
نزلت .. هوه لسه نازل دلوقتي بس كنت عايزه اقولك انه جه ".. قلتلها "وجه
ليه مانا بكون قاعد هنا معاه" .. قالتلي " مش عارفه هوه لعب مع ياسمين
شوية ونزل" .. بعدها قالتلي " هوه عارف اني قعده معاكم كام يوم وان جوزي
مسافر؟" .. قلتلها "اه انا كنت قولتله" .. قالتلي "ليه كده يا
ياسين يمكن كده جه عشان يشوفني كده يعملي مشاكل مع اشرف جوزي" .. قلتلها
"انا اسف يا يسرا .. متوقعتش حاجة زي كده انتي اتجوزتي من زمان وموضوعكم
اتقفل عليه خلاص" .. قالتلي "خلاص مش مشكله لما تيجي ابقى شوف بقى اللي عملوا لياسمين"
قولتلها "عمل ايه لياسمين؟ " .. قالتلي رسم على دراعها رسمه غريبة كده
.. مكتوب عليها حاجة تشبه ل "تجربة 5" ..
اتصدمت من الي عمله عمرو في ياسمين .. دي
طفله وبنت يسرا اللي كان حيموت ويتجوزها .. ازاي يعمل فيها كده كنت حتجنن .. قلت
لا يبقى هو عمل كده عشان يوصل لي فكرة انه عرف اني فاهم مثلا .. فقلتلها
"وعمل مع ياسمين حاجة غير انه رسملها الرسمة دي؟" .. "قالتلي لا
عادي ادالها بومبوني كده ورسملها الرسمة دي على دراعها ومشي على طول .. بس مكنتش
حابة انه ييجي وانت مش هنا" .. قلتلها "انا حكلمه وحافهم منه جه
ليه" .. وقفلت معاها واتصلت بيه .. اتصلت ب "عمرو" ..
رد عليا وكان شكله مبسوط باللي عمله .. قال
لي .. "انت فتحت الموبايل؟" .. قلتله "اه .. انت اتاخرت ليه انا
عايزك ضروري" .. قالي ماشي انا حوصل دلوقتي .. وصل عمرو الصيدلية .. وحنان
مشت بعدها .. بعدها قال لي "انت اكيد عايز تفهم وانا حفهمك" .. قلتله
"ياريت" ..
قالي انه بيشتغل مع ناس .. عاملين دوا جديد
.. كانو عايزين يجربوه على البشر هوه لسه تحت التجربة وبيحسنوه لو ظهر اعراض
جانبيه .. فبيعرضوا على ناس فقيره محتاجة فلوس انهم يجربوا الدوا ده .. ويدوهم
فلوس كتير .. الدوا ده شبه البومبوني كده .. بعد ما يتاخد لو ظهرت عليهم اعراض
تشبه اعراض الادمان كده لازم ياخدوا منه تاني .. من نفس العينه اللي اخدو منها اول
مره .. ولو حصل كده بنبدأ نحسن الدوا ده احنا ..
اتفقنا مع اللي بنجرب فيهم انهم ما يقابلوناش
في المكان اللي بنعمل فيه التجارب غير اول مره بس .. وقتها بنوشمهم برقم التجربه
ونديهم الدوا نجربه .. بعدها لو ظهرت الاعراض تاني يجولي الصيدلية .. ما يدخلوش
الا لو انا فيها .. بيطلبوا ابره مسكنه عادية .. وهما خارجين انا احاسبهم وحسب رقم
التجربه اديهم الدوا في وسط باقي الفلوس ..
عملو اول دوا "تجربه 1" وشمنا على
الراجل الوشم وادناه الدوا .. لما الراجل بدأ يجي الصيدلية وانا فيها وحنان اديته
حقنه مسكنه .. انا اديته الدوا تاني حسب رقم التجربه ..
بعدها عرفوا انه مش بيجيب النتيجة المرغوبة
.. فحسنوا الدوا شوية ب "تجربه 2" وادناه لواحد تاني ووشمنا عليه
"تجربه 2" .. وجه بردك الصيدلية وانا فيها وامل اديته حقنة مسكنه .. بس
امل مخدتش بالها من الوشم .. انا اديته بردك الدوا اللي اخد منه حسب التجربه ..
رجعت الشركه حسنت الدوا ب "تجربه
3" وده اللي اخد منه ماهر .. لما جه الصيدليه كنت انت موجود .. واخدت بالك من
الوشم .. وفضلت تشمشم عنه ..
المشكله ان اللي مش بيستمر على الدوا بتاعه
لو جاتله الاعراض بيموت على طول .. هوه في حالة ماهر عمل اكتئاب جامد جدا خلته
ينتحر يعني فعلا محدش قتله هوه انتحر من الاكتئاب ..
ليست هناك تعليقات:
إرسال تعليق