فضلت قاعده قصاد
الظابط مش عارفة اتكلم .. كل شوية اقوله "انا حأحكي كل حاجة لحضرتك" ومش
عارفة أبدأ منين .. ومش عارفه حيصدق ازاي
حكايتي وانا معنديش اي دليل على صدقها .. مش عارفة اللي باعمله ده صح ولا غلط بس
انا لازم اعترف بكل حاجة وزي ميحصل يحصل بقى أنا فعلا تعبت قوي من الموضوع ده ..
أنا "أسماء"
.. بنت عادية جدا زي أي بنت مفيش حاجة بتميزني .. عمري معشت تجربة مخيفة زي اللي
انا عايشة فيها دلوقتي .. منكرش اني السبب في تدبيس نفسي التدبيسة دي .. كان عقلي
فين وانا بأعمل كده ..
والدي
"محمود" مدرس .. ووالدتي متوفيه من حوالي سنه ونص .. عندي تلات
اخوات بنات .. نجلاء بس
من أم تانية ووفاء وعلياء دول اخواتي الشققة.. اكبر واحدة
فينا "نجلاء" وأنا بعدها على طول .. احنا من دمنهور .. من حوالي تلات
سنين نجلاء جالها في التنسيق جامعة اسكندرية .. كانت حبيبتي بتيجي كل يوم وتروح
بين دمنهور واسكندرية .. جيت انا من سنة دخلت معاها نفس الجامعه .. فبابا فكر
يأجرلنا شقة سوا انا وهيه .. وننزل كل أسبوع دمنهور او هوه يجيلنا مع اخواتي حسب
الظروف ..
أنا مش بتكلم مع
اخواتي كتير رغم ان كلنا بنات .. ماعرفش ليه بس في فجوة بيننا شوية .. بحس بينهم
دايما اني وحيدة رغم اننا كتير .. مكنش في حد بيونسني في الوحدة دي غيره هوه
"أشرف"
عرفت أشرف من الفيس
بوك .. معرفش علاقتنا ازاي اتوطدت قوي كده .. كنت بحب احكيلة تفاصيل يومي كلها
وهوه كمان .. كل ما يقابلني مشكلة او ابقى متضايقة او حتى فرحانه لازم اشاركه ..
مانكرش اني حبيته شوية بس عمري ما صارحته بكده اصل ازاي ده بيكلمني كتير قوي عن
واحدة ناوي يخطبها وبيحبها ومفاتحها في الموضوع كمان ومتفقين .. لو اتعاركوا
بيحكيلي وبأقف معاها و في صفها دايما وخلاص ببقى خايفة اقف في صفه واقويه عليها
يسيبها .. وقتها ححس بالذنب واني السبب وابق عملت كده علشان اقربه مني .. كنا
بنتكلم تقريبا كل يوم ..
اشرف من القاهره مش من
هنا .. لما بابا فكر اننا ننقل اسكندرية انا ونجلاء قلتله على الموضوع وقتها وقال
لي :
اشرف: طب انتو تعرفوا
حد عنده شقة في اسكندرية تأجروها ولا لسه بتدوروا؟
اسماء: لا منعرفش بس
بابا لسه حيسأل الأول معارفنا وبعدها يشوف .. وبيقول ممكن يكلم سمسار مش عارفة
اشرف: طب انا عارف واحد
صاحبي بيأجر شقته هناك ونظيفة جدا وانا أضمنهولك ومكانها حلو بالنسبة
لكليتكم
أسماء: طب حلو بس أنا
كده حقول لبابا ايه اساسا ميعرفش اني باتكلم معاك
اشرف: بسيطة قوليله
انها شقة بتاعت قريب واحدة صاحبتك ومكانها كويس وخليه بروح يشوفها وكده ..
اسماء: طب ما صاحبك ده
ممكن يجيب سيرتك قصاد بابا
اشرف: انا حظبطه
متقلقيش انتي عايزه تقولي الشقة تبع يسرا ولا رضوى نقي واحدة وانا حقوله يقول انه
قريبها حلو كده؟ مش دول صحابك عادي وباباكي عارفهم
اسماء: طب تمام حلو
خليها يسرا .. انا حقول لبابا ان يسرا صاحبتي قريبها عنده شقة ف اسكندرية بيأجرها
ومكانها كويس وكده .. وبابا بقى يتعامل ..
دي كانت اول غلطة ليا
.. لاء دي التانية .. الأولى أكيد اني كنت بكلم اشرف من ورا بابا كمان .. كان
دايما عندي تأنيب ضمير من كده .. بس اشرف ملهوش دعوى باللي حصل لي بعد كده ..
بعدها مرت الايام
وبابا عجبته الشقه ونقلنا فيها انا ونجلاء .. الشقة بحري ومش مكشوفه وقريبه
من الكليه .. عبارة عن اوضتين كويسين كل واحدة فيهم فيها سرير ودولاب وسراحة صغيره
وكوميدينو .. وصالة فيها سفره مدوره وانتريه وتليفزيون .. دخلت أول يوم اتفرجت على
الشقة اتبسطت قوي .. حسيت اني طالعة مصيف مش رايحة اعيش وكلية .. دنيا جديده وكنت
متحمسه ومبسوطه جدا ..
لما دخلت اوضتي أول
مره لفت نظري برواز متعلق في الحيطة .. عليه رسمة قطة ملامحها جميله جدا .. ناصعة
البياض .. عينيها خضرا لون النجيلة اللي نايمة عليها .. كانت مخلياني
متنحلها بقول في نفسي اكيد اللي رسمها فنان كبير دي مبهره قوي .. لقيت توقيع
في الصورة حاولت اقراه بس الحروف مش واضحة او مكتوب بلغه تانيه تشبه العربي .. انا
بحب القطط وعجبتني الرسمة فقررت اخلي البرواز وماشيلهوش من مكانه خالص ..
بعد كام يوم هناك كنت
حاسه ان المرايا بتاعت السراحة مش مظبوطه زي متكون متركبه على المراية
وبتتحرك يمين وشمال .. للأسف قلت اعدلها .. حاولت احرك المرايا براحة اشوف حتتحرك
فعلا جوه الاطار الخشب ولا لاء .. اتحركت فعلا بس وقعت مرة واحدة مني
.. معرفش عملت ايه غلط وانا بحركها بس هيه وقعت واتكسرت .. الغريب انها لما
وقعت لقيت الخشب اللي كان وراها مكتوب عليه .. بخط ايد .. كبير .. وبقلم اسود عريض
.. كان مكتوب موقع نت مالي مساحة الخشب كله .. معرفش موقع ايه المكتوب ده ..
وقتها سمعت على
الموبايل رساله جديده جاتلي على الفيس بوك .. بصيت لقيته اشرف
اشرف: اسماء انا مخنوق
قوي من ابو يمنى الحاجات اللي طلبها مني لما اتقدمتلها عايزه فلوس كتير هيه الناس
دي بتفكر ازاي
اسماء: معلش هوه بس
عشان بنته وعايز لها احسن حاجة لما ربنا يرزقكم ببنوته حتعمل معاها كده .. وكمان
يا سيدي يمنى تستاهل تتعب عشانها شوية ولا ايه ..
اشرف: تستاهل اكيد
مقولتش حاجة .. فكك انت بتعملي ايه؟
اسماء: ابدا كنت بكسر
المرايا
اشرف: مراية ايه؟
اسماء: مراية السراحة
كنت بدعك حاجة فيها كده المهم اتكسرت ومش ده المهم كمان
اشرف: اومال ايه
المهم؟
اسماء: انا لقيت حاجة
غريبة قوي وراها .. كان مكتوب على الخشب موقع كده بخط اسود كبير
اشرف: يمكن طابعين
موقع المكان اللي عملها
اسماء: لا ده بخط ايد
كمان دي سراحات قديمة قوي مظنش
اشرف: طب لما دخلتي
على الموقع لقيتيه بتاع ايه
اسماء: لا لسه مدخلتش
ده يدوب دلوقتي قبل ما نتكلم على طول
اشرف: طب ابعتهولي كده
اسماء: ......
اهو
اشرف: تمام يلا نفتحه
اسماء: مش بيفتح حاجة
معايا
اشرف: ولا انا كمان ..
ممم حتلاقيه حاجة قديمة وقفلوها ولا حاجة
اسماء: ممكن بردك
اشرف: المهم ابقي شوفي
مرايا تانيه ولا حتعملي ايه
اسماء: حشوف في مراية
نجلاء بقى لغاية متصرف احنا اخوات بردك
اشرف: انا بقول كده
بردك .. البنات متستغناش عن المرايات ابدا
مر كام يوم بعدها رجعت
من الكلية لقيت رساله من أشرف على الفيس بوك.. بيقلي فيها ان اللنك فتح معاه
.. وانه لقى جواه حاجات غريبة .. اول مقريت الرساله لقيته دخل اون لاين وبعت
يسألني ..
اشرف: انتي في صورة
قطة في الاوضة عندك؟
اسماء: ايوه عرفت منين
مش فكرة كلمتك عنها قبل كده؟
اشرف: من الموقع اللي انت لقيتيه
ادخلي كده حاطين فيديو غريب ..
خفت من كلام اشرف..
دخلت الموقع وانا قلقانة .. مش عارفه فيديو ايه اللي بيقول
عليه .. اول ما دخلت لقيت فيديو شغال فعلا .. بيصور الأول الاوضة
كلها .. نفس اوضتي بالظبط .. بس من غير الملاية بتاعت السرير .. وبرواز القطة
موجود .. بعدها كلام اتكتب على الشاشه .. كان مكتوب
"اهلا بيكم مع
قطة الأمنيات .. دخولك هنا يعني انك كنت من المحظوظين اللي عرفوا صفحتنا من ورا
المرايا .. لازم تعرف ان البرواز اللي قدامك في الاوضة ده مش أي برواز .. ده برواز
قطة الأماني"
بعدها رجعت صورة
الأوضة وقربوا لبرواز القطة ببطئ .. وفجأه البرواز بتاع القطه كان بيتحرك .. وبان ورا
البرواز فتحه زي خزنه مدفونة وراها .. ورجع تاني كلام مكتوب ..
ليست هناك تعليقات:
إرسال تعليق