كنت قاعدة في الأوضة المخيفة دي على الكرسي مش عارفه اعمل ايه .. اقولهم على اللي عايزينه ولا افضل ساكته .. كنت خايفة .. بصيت على "بشير" المقتول قصادي ومش عارفه المفروض اعمل ايه .. ومش قادرة اخليه يصعب عليا .. وقتها افتكرت أول مرة شوفته فيها ..
انا ماعرفهوش من زمان .. يومها كنا في اواخر
الشتا اللي فات .. كان الجو حلو يومها .. لبست .. ونزلت اروح زيارة بابا في السجن .. محدش
بيرضى يزوره غيري .. امي واخواتي مش بيرضوا يروحوا الزياره .. ماما على طول بتفضل
تشتم فيه وتذم فيه .. دايما بتقول "سالم" ده زوج ظالم واب ظالم .. بس انا واثقه ان بابا مسجون ظلم .. كانت
دايما بتحاول تخليني مزرهوش بس انا كنت بصمم .. الحمد لله المفروض يطلع في الصيف اللي جاي ..
رحت يومها متقلتش هدومي الجو حلو .. زرت بابا
.. بعدها طلعت على خالتو "نعمه" .. اصل بنتها "هايدي" دي اقرب
صاحبة ليا .. قعدت معاها شوية نتكلم عن كل حاجة في الدنيا وعن بابا بالخصوص .. لما
لقيت الجو بدأ يسقع شوية سلمت عليهم ونزلت .. كان الليل دخل .. والجو فضل يسقع
اكتر .. انا بركب مواصلتين عشان اروح البيت .. ركبت اول مشروع ونزلت .. بعدها نزلت
سيول .. وزادت الرياح فجأه .. وبدأ الرعد والبرق .. كنت مش عارفه اعمل ايه .. حسه
اني بطير مع الهوا .. حاولت اتحامى تحت بلكونات عماره من المطره .. كنت منكمشه جوه
نفسي .. مش عارفه حتفضل كده لامتى.. كنت خايفه قوي ماعرفش ليه .. بس فضلت واقفة
مستنية الجو يهدى شوية ..
كان في عربية راكنه قريب مني طول مانا
واقفة.. كنت باصه عليها وانا سرحانه وبفكر اعمل ايه .. اتخضيت لما لقيت واحد طالع
منها وكان باصص عليا .. فضل يقرب مني .. واضح انه جايلي انا .. وقف أدامي واداني
شال كان في ايده .. قالي "اتفضلي الشال ده .. الجو ساقع جدا وانتي شكلك
سقعانه" .. كنت فرحانه قوي وقتها .. قلت في سري الدنيا لسه بخير فيها جدعان
كده .. بس اعتذرت له .. اصر اني اخده وقالي ان هوه مش محتاج له ومعاه العربية
حيروح .. قالي لولا انك ممكن تفهميني غلط كنت قلتلك اوصلك .. بعد اصراره الكتير
ولاحتياجي الشديد للشال .. اخدته .. كان شال غريب .. لونه اسود وكبير قوي .. لما
بحركه باسمع صوت زي مشمع جواه .. مش مهم شكله .. المهم اتدفي ..
دي كانت اول مرة اشوف "بشير" مكنتش
لسه اعرف له اسم .. بعدها بشوية الجو بدأ يتحسن مش تحسن كبير بس الرعد والبرق وقفوا
والمطرة هدت شوية .. رحت ركبت المشروع ورجعت البيت .. مكنتش مصدقه نفسي اني وصلت
.. وكل شوية ابص للشال وافكر في اللي حصل ..
لما روحت سلمت على ماما ..سألتني عن الشال
حكيتلها .. زعقتلي كتير اني وافقت اخده .. وسألتني حيرجع ازاي لصاحبه .. قلتلها مش
عارفه انا ماعرفهوش .. كنت متضايقة جدا .. زعلانه قوي من ماما .. انا معملتش حاجة
غلط عشان تزعقلي قوي كده .. مكنش هاممها اني كنت سقعانه وتعبانه .. المهم مخدش
حاجة من حد .. و زي كل مرة طلعت غلي في الأكل .. طلعت من اوضتي رحت المطبخ مكشره
.. عملت سندوتشين بيض بالبسطرمة ورجعت عشان اكلهم في اوضتي .. قفلت عليا الباب
عشان ابين اني مقموصه .. بعدها جاتلي رسالة من "هايدي" بنت خالتي على
الواتس اب .. قالتلي "انت عرفتي تروحي في الجو ده طمنيني عليكي يا سمر"
.. رحت اتصلت بيها ..
اول مكلمتها قالتلي "ايه يا سمر جيتي
خلاص؟" .. قلتلها "اه يا ستي .. بس اتعذبت الجو كان قالب قوي" ..
قالتلي "مانا متلجه مكاني .. وسمعه الرعد والبرق وحاسة باصوات مهوله
بره" .. قلتلها "انتي سمعتيها انا شفتها بعيني يا هايدي" .. قالتلي
"معلش المهم عرفتي ترجعي البيت انا قلقت عليكي قوي" .. قلتلها
"تقريبا كده يا هايدي انتي الوحيده اللي قلقتي عليا .. ماما مكنش
هاممها" .. قالتلي "ليه يا سمر بتقولي كده خالتو بتحبك جدا اكيد كانت
قلقانه عليكي" قلتلها "انا حقولك يا ستي .." وحكيتلها اللي حصل ..
في الاخر قلتلها "فانا اخدت الشال يا
هايدي فيها حاجة دي؟ " .. هايدي قالتلي " حلو؟" قلتلها "هوه
ايه اللي حلو؟" .. قالتلي "اللي اداكي الشال .. صغير وحلو كده" ..
ضحكت جامد وقتها وقلتلها "يا بنتي انتي رايقة .. بس انا ابقى غلطت كده"
.. صوتها كان مبتسم قوي و قالتلي "لا مفهاش حاجة .. خصوصا لو صغير وحلو
".. قلتلها "اصل ماما لما عرفت قالتلي حنرجعهوله ازاي ده .. ووانتي ازاي
تعملي كده .. زعقتلي قوي .. مكنش هاممها اني كنت حموت من السقعه .. انا عرفت أركب
بالعافيه .. أومال لو قلتلها انه قالي اوصلك حتعمل فيا ايه" .. راحت هايدي
ضحكت وقالتلي "كمان يوصلك لا ده اكيد معجب يا جميل" .. انا ضحكت وقلتلها
"هوه صغير وحلو على فكرة وجدع قوي بس بردك رفضت طبعا .. اخدت الشال بس"
قالتلي "ماشي يا عم .. ابقي احتفظي بالشال بقى وكل متمسكيه فكري فيه "
..كانت بترخم عليا قوي ..
بعدها بيومين الجو كان كويس جدا الصبح .. و
"هايدي" جاتلي البيت عشان نروح نفطر سوا في النادي .. اول منزلنا من
البيت .. لقيته قصادي على السلم جنب باب العماره ..
ليست هناك تعليقات:
إرسال تعليق