بعدها كمل سمير حكايتة لعبد الله:
بعدها سلمى غابت قوي عليا ومكنتش بتتصل .. وجه يوم جالي زائر من تحت
.. لما طلع اداني ازازه .. قالي ان سلمى اديته كل الذهب اللي معاها وطلبت منه يوصل
لي الازازه دي .. سألته عنها قالي ان قائد حراس الكاس الذهبي امر بقتلها .. وانه
ميعرفش سبب الامر ده .. قال لي "بس
هيه لما عرفت اديتني الازازه دي ووصتني ادهالك
وسابت ليا كل ذهبها.. هيه كانت معانا في الحزب وبتناضل بقوه عشان تزود
عددنا" .. الزائر بعدها طلع من البيت وراح يجيب شوية ناس معاه عشان ينزلهم
معاه لما يرجع زي كل الزوار مبيعملو.. وانا قعدت مش عارف اواسي نفسي ولا افكر ..
اللي امر بقتلها كده كان قائد حراس الكاس الذهبي .. يعني عبد الله ابننا ..
فتحت الاازازه لقيت سائل ذهبي .. فهمت ان ده السائل الذهبي اللي هيه
وصلتله .. وبعتته ليا عشان احاول اكمل اللي هيه معرفتش تعمله .. اني اشربهولك يا
"عبد الله" .. بعدها انا كتبتلك الرساله .. واديت الزائر
"ذهب" كتير عشان عارف انه بيحب الذهب من كلامه .. واديته الرساله دي
ووصيته يوصلهالك ولو عايز ذهب تاني كنت عطيته .. وفضلت مستنييك يمكن تطلع عشان
اشربك من ماية الكاس الذهبي لما تيجي هنا ..
-------------------------------------------------------
وقتها بص عبد الله لسمير بابتسامة وقال له "وانت دلوقتي عايزني
اشربه؟" .. راح سمير ضاحك وقال له "لا .. انا عايز حاجة تانية خالص ..
انا عايزك تاخدني معاك لتحت .. لبيت العنكبوت.. سمعت عنه كتير ونفسي اشوفه"
.. بعدها سمير دخل الاوضة اللي فيها المعبر مع عبد الله .. وفتح الباب .. وطلّع
المفتاح وسابه في الاوضة .. كان من شروط انه يعرف ينزل بعد مجاله التليفون انه
يسيب المفتاح وينزل مع قائد حراس الكاس الذهبي ..
ونزل سمير لأول مرة مع عبد الله
.. وقفل الباب وراه.. نزل وشاف كل حاجة قالهاله جده وسلمى والكتاب عن تحت
.. واول حاجة قالها لعبد الله .. "انا نفسي اشرب من الماية" .. وقتها
عبد الله ضحك وقال له "طب مش كويس اني حطيتلك منها في الشاي فوق عشان تتشوق
تنزل وتشوف النعيم بعنيك؟"
لما سمير عرف ان عبد الله حاطله من الماية
بتاعت بيت العنكبوت في الشاي فضل يضحك .. وسكت وقال له "انت باينلك طالع
لابوك" .. فعبد الله قال له "لا انا اذكى منه .. انا جبته هنا برغبته ..
ابويا ده كان من الغباء انه محسش اني بحطله حاجة في الشاي .. خليته يسيب المفتاح
فوق وهوه الحارس الوحيد .. انا كده عملت اللي محدش عرف يعمله في الحزب عندي .. كده
قفلت المعبر رسميا .. انت متعرفش ان محدش بيعرف يرجع ومعهوش مفتاح ولا ايه؟"
هنا سمير فضل يضحك تاني .. سأله عبد الله عن
سبب ضحكه .. قاله سمير "اصل انا كمان كنت حاططلك ماية الكاس الذهبي في
الشاي" .. وقتها عبد الله اتصدم .. حس بغباءه .. قد ايه هوه غبي .. ازاي
مفكرش ان ابوه ممكن بردك يعمل كده فوق ..
مر اليوم والحزب اللي فيه عبد الله بيحتفل
بنصره .. خلاص كده لا عوده ل "بيت الأرض" .. كان الحزب التاني متضايق
جدا بس مكنش فيه حل .. وكان سمير بدأ يدخل اكتر في اجواء اهل "بيت
العنكبوت" ويشرب اكتر واكتر .. ووسط ده كان "عبد الله" او "سعد"
قلقان جدا .. مش عارف ايه اللي ممكن يحصله لما شرب من ماء الكاس الذهبي .. ومقلش
لحد انه شرب منه خالص ..
بعدها بيوم كان بدأ تأثير ماية الكاس الذهبي
على عبد الله .. بدأ يكره تصرفاته وتصرفات الناس حواليه .. كان حاسس ان في حاجة
غلط .. راح للمعبر وبيفكر في اي طريقة تطلعه ومش عارف .. سمير كان مغيب في عالم
تاني بيعشق "بيت العنكبوت" .. كان عبد الله بيفكر يشرب ابوه من ماية
الكاس الذهبي بس جاتله فكره احسن قال يجربها ..
في يوم خلى كل الحرس يمشوا .. واخد الكاس وصب
كل الماية اللي فيه في ماية النهر .. و بدلها بماية تانية ذهبيه عشان محدش يحس
بحاجة اليوم ده ..
فضل اليوم يمر ببطئ لغايه مجه بعدها بيوم ..
صحى الناس كلها حسه بذنوبها .. حسه بعصيانها .. كل الناس ندمانه .. كل اللي كان
على الارض او شافها كان مشتقلها .. كان سمير واعي انه غلط .. كان كلهم فهموا ان
العالم ده اسوأ بكتير من اللي كانو شايفينه ..
بدأوا يفكروا في طريقة يطلعوا بيها مش عارفين
.. بدأ منهم ناس كتير تدخل المكتبه المهجوره .. وبدأوا يقروا في الكتب .. منهم
سمير وعبد الله .. هناك عرفوا حاجات مهمه جدا .. عرفوا ان الكتب دي مكتوب فيها
ازاي يطلعوا "بيت الأرض" .. مكتوب اسرار عن طرق تانية يعبروا فيها من
تحت لفوق .. مكتوب فيها طرق ازاي يدمروا "بيت العنكبوت" .. مكتوب فيها
ان اهل بيت العنكبوت كانو بيلعنوا المكتبه عشان السبب ده ..
ومن هنا قرر سكان "بيت العنكبوت"
يهجروه ويتنقلو ل "بيت الأرض" ..
ليست هناك تعليقات:
إرسال تعليق