مر كام يوم وتقريبا يوميا بيجيلنا اتصال منها بليل .. وانا اول مبعرف انها
هيه كنت بخاف وقلبي ينقبض .. معرفش ليه كان الشعور ده بيسيطر عليا لما بيجي سيرتها
..
في مره وهيه بتكلم اهلي سالوها كالعاده عن اسمها
.. قالتلهم "مروه" ..
احنا
فعلا كان معانا واحده اسمها مروة في الفصل .. ومصرية بردك .. بس كنت مستبعدة بردك
انها تعمل كده .. انا كنت متأكده انها مش حتتلغبط وتقول اسمها .. اكيد قالت اسم
مروة عشان تدخل مروة معانا في دايرة الشك .. ليه ماعرفش .. انا قلت الاحسن وقتها
ماقولش للبنات انها جابت سيرة مروة .. كنت حاسة ضميري حيوجعني لو دخلت الشك في
قلوبهم من ناحيتها وانا شبه متأكده انها مظلومة ..
مر كام يوم .. ومرة واحنا في المدرسة .. اول
اليوم الصبح بعد الطابور .. دخلت الفصل .. لمحت ورقة ملزوقة على ديسك ياسمين ..
اتجاهلت الموضوع وقعدت .. كان كل البنات بتدخل وقتها .. دخلت ياسمين وقعدت ..
ونادت عليا .. والاء كانت جنبها ..
ياسمين: نجوى تعالي بصي كتبالي ايه ..
قرينا الورقة المكتوبة بقلم حبر وردي فاتح ..
"نفدتي منها المره دي ولحقتي كراسة ال Ex .. لكن المرة الي جاية مش حتلحقي حاجة .. خافي على نفسك وعلى
حاجاتك مش كل مرة حتلحقيها كده"
كانت اول حصة يومها
علوم .. اول مالمدرسة دخلت رحنالها احنا التلاته ( ياسمين والاء وانا ) .. ياسمين
وريتها الورقة .. الموضوع يومها وصل للمديره .. كان من اغرب المواضيع في المدرسة
..
كان جوايا كلام خايفة
اقوله يومها اظلم حد .. انا عارفه الخط كويس .. وعارفه مين الوحيدة اللي معاها قلم
حبر وردي في الفصل ..
بعد اسئله المدرسة
لواحده واحده فينا .. وبعد زعيق من المديره والمدرسات .. رجعنا تاني للحصة ..
ورحنا معمل العلوم .. افتكر يومها مخدناش اي حاجة كان طول الوقت الكلام على
الموضوع .. ياسمين كانت منهاره تماما .. ونجلاء كانت قاعده .. وانا كل شوية ابصلها
.. لغاية مطلعت القلم الوردي الحبر !!
وقتها ماعرفش اللي
عملته غلط ولا صح .. بس قلت لياسمين
نجوى: ياسمين .. هوه
الكلام اللي في الورقة ده كان بقلم شبه اللي مع نجلاء؟
بصت ياسمين لنجلاء .. وشافت
القلم في اديها .. وراحت على طول للمدرسة قالتلها .. فعلا محدش كان عنده قلم كده
غيرها .. نجلاء انكرت خالص انها عملت حاجة كده .. فطلبت منها المدرسة انها تكتب
نفس الجمله عشان تقارن الخطوط ..
اخدت القلم وكتبت نفس
الجملة .. بس لاحظت حاجة بردك .. لاحظت انها كانت بتغير خطها اللي انا عارفاه كويس
.. فضلت مش عارفه اسكت ولا اتكلم .. جوايا صراع بين اني خايفة اظلمها وازرع شك
جواهم .. وخايفه اسكت تطلع هيه وتدمادى .. لو هيه فعلا حتبقى كانت عايزه تفرق بيني
وبين اهلي واصحابي !!
الاء وقتها اللي اتكلمت
وريحتني ..
الاء: بس ده مش خطك يا
نجلاء .. انتي خطك فعلا زي اللي كتبت الورقة ..
نجلاء: لا خطي مش كده
المدرسة راحت معاها
الفصل تجيب حاجة من كراستها كاتباها قبل كده تقارن بيها الخطوط .. واحنا فضلنا في
المعمل كلنا شاكين في نجلاء ..
رجعت المدرسة بعد شوية
بتأكد انه خطها .. نجلاء انكرت بردك وقالت ان خطها سهل يتقلد .. واللي بيعمل كل ده
سهل ياخد قلمها يكتب بيه عشان يشككنا فيها ..
المدرسة: طب وليه غيرتي
طريقتك في الكتابة لما قلتلك اكتبي
نجلاء: عشان عارفه انه
شبه خطي قوي .. ولو كتبت بخطي حتقولو انا .. وانا معلمتش حاجة كده .. اكيد حد عايز
يشككو فيا ..
مر اليوم وروحنا .. كنت
محتاره هيه نجلاء فعلا ولا لاء .. يومها بليل كلمتني ميرنا ..
ميرنا: نجوى .. احنا
ركبنا كاشف رقم في البيت وجالي مكالمة من البنت الغريبة دلوقتي .. كاشف الرقم
بيكتب اسم اللي اتصل وكتبلي "سمير" .. اكيد هيه نجلاء مهو اسمها
"نجلاء سمير!"
تقريبا لعقلي الصغير
صدقت كلامها وقتها .. بعد مقفلت معاها كالعادة حكيت لاهلي .. وقتها اكدولي ان مفيش
حاجة اسمها كاشف بيطلع الاسم .. ولو مسجله نمرة صاحبتها حيتكتب "نجلاء"
مش حيتكتب "سمير"!!
بعد اليوم ده بدأت تقل
المكالمات الغريبة لمرة في الاسبوع .. وبعدها لمره في الشهر .. مرجعناش اصحاب زي
الأول .. يمكن انا والاء كنا اكتر اتنين مش شاكين في بعض .. ويمكن الموضوع ده
خلانا نعرف ان خلافتنا البسيطة كانت عبيطة فعلا ..
ومر شهرين ورا بعض مجاش
اي تليفون غريب .. و في يوم كنت قاعده في البيت .. كان يومها اجازه عشان العيد
الوطني .. ومصادف ان يومها عيد ميلادي .. امي كانت بتصلي والتليفون رن .. انا
مردتش كالعاده .. كنت بطلت ارد على التليفونات وقتها لفتره طويلة .. الانسر ماشين
رد قبل مأمي تخلص صلاه وسمعت ..
"لا لا لا لا…
لا لا .. لا لا لا لااا لو لو" .. قلبي
اتخض كالعادة .. بس بعدها كمل
"كل سنة وانت طيبة
يا جميل .. انا خالك يا بنت ردي"
رديت على التليفون
نجوى: كده يا خالو انا
اتخضيت مانت عارف اللي انا فيه
وانعدمت الاتصالات الغريبة
لغاية اخر السنة .. وكانت اخر سنة لميرنا هناك قبل مترجع لمصر نهائي مع اهلها ..
اتصلت بيا قبل سفرها بحوالي اسبوع
ميرنا: نجوى حتوحشوني
قوي كلكم ..
نجوى: انت كمان يا
ميرنا حتو ..
قطعني وقتها سماعه
تانية اتفتحت عندها في البيت .. اتكلم منها صوت عارفاه كويس .. خايفة لغاية دلوقتي
اكون ظالماها .. صوت يشبه قوي قوي قوي يكاد يكون هوه .. لاء هوه فعلا .. صوت
المجهوله ..
المجهوله: ايوه يا
نجلاء عامله ايه
و بعدها غيرت صوتها
وكملت
المجهوله: الحمد لله
وانت يا ميرنا
وقتها ميرنا زعقت قوي
ل"اختها" عشان تقفل السماعه .. حسيتها متبرجله قوي وقالتلي انها اختها
الصغيره وبتلعب .. انا مبقتش فاهمه هيه اللي متفقه معاها ولا ايه تتصل بينا وتعمل
كده! .. مبقتش فاهمه هيه صوتها شبه قوي كده المجهوله ولا هيه نفسها .. يمكن ميرنا
ونجلاء متفقين يعملو فينا كده مثلا ونحتار بينهم! .. مبقتش فاهمه اي حاجة .. ومش عارفه
اواجه ميرنا ولا لاء .. دي خلاص اخر سنه ليها هناك .. قاطع تفكيري كلامها
ميرنا: نجوى بقولك
عايزه نمرتك بتاعت مصر عشان نبقى نكلم بعض
نجوى: حاضر ..
وقتها طلعت النمره من
النوته وانا بفكر .. لا لو هيه فعلا يبقى مش عايزه اكلمها تاني .. جوايا حاجة
بتأكدلي انها هيه .. خايفة منها جدا .. في الاخر مليتها نمرتي .. بس ملتهالها
ناقصة !!
بعدها قلت لأهلي و
شجعوني اني عملت كده .. مقلتش لباقي البنات عن شكي ده .. والسنه اللي بعدها انا
والاء كنا في فصل واحد .. بعدنا عن نجلاء وياسمين .. تقريبا مكنش بينا معاهم غير
مجرد سلام لو مرينا جنبهم .. بس الموضوع ده اثر في علاقتي بالاء قوي .. خلانا
اصحاب قريبين جدا .. محدش يقدر يفرق ما بينا .. مبنتخاصمش لابسط حاجة .. ومش بنثق
في حد بسهولة ..
(تمت)
ملحوظة: الحكاية دي
حقيقية .. يمكن مش احلى قصة كتبتها .. بس بالنسبالي افضل واحده عشان القصة الوحيده
عشت احداثها بتفاصيلها ..
ليست هناك تعليقات:
إرسال تعليق