الفصل - الجزء الأول

كانت اغرب حكايه مرت عليا .. عمري منسيتها ..شعور انك تبق قاعد في وسط ناس .. وعارف ومتأكد ان حد منهم عينه عليك على طول من غير متحس ..  وبيحاول يضرك .. ومتعرفش هوه مين فيهم .. صاحب قريب ولا حد بعيد .. ولا تعرف بيعمل فيك كده ليه  .. كل مافتكر باستغرب ازاي طفله زينا قدرت تفكر بالشكل ده  .. كنا اطفال فعلا يعني اولى اعدادي مكناش كبار وقتها .. كانت اقصى اماني واحدة فينا انها تلعب بلعبه معينة .. او تطلع من الاوائل على الفصل ..

انا نجوى .. كنت ايامها عايشه مع اهلي في دوله عربيه .. بدرس في مدرسه حكوميه .. كنت بحب المدرسة دي جدا .. فصلنا كان واسع .. كنا ٣٥ بنت .. كان ازحم فصل في المدرسة رغم ان نص مساحته فاضيه بس عندهم كان كده العدد كتير .. كان في مننا حوالي  تسع بنات من مصر .. كنت قريبه لتلاته منهم جدا .. الاء وميرنا و نجلاء ..

انا من اسكندريه .. الاء كانت من سوهاج .. ميرنا ونجلاء كانو من القاهره .. بدأنا السنه واحنا مع بعض في نفس الفصل .. كنا نعرف بعض من السنه اللي قبلها (خمسة ابتدائي)  .. انا كنت قاعده في اول صف في الفصل اقصى اليمين  .. و الاء كانت ورايا .. وجنب الاء كان مكان ياسمين عماّر .. ميرنا ونجلاء كانو قاعدين ورا في اقصى الشمال مش  جنبنا ..

مكان ياسمين جنب الاء في الصف اللي ورايا خلانا نتعرف عليها انا والاء .. وشويه شويه بقت صاحبتنا .. كانت اشطر بنت في الفصل او يمكن كمان في المدرسه كلها .. كانت معروف انها على طول بتطلع الأولى .. هيه مصريه زينا بردك بس مكنش عندها اصحاب كتير .. و شويه بردك و اتعرفت ياسمين على ميرنا ونجلاء وبقت معانا على طول ..

انا والاء رغم اني كنت بحبها قوي لكن كنا بنتعارك كتير .. تقريبا مكنش ليا اي خلافات مع حد من البنات غيرها .. كلها كانت خلافات طفوليه وقتها .. من كتر هيافتها مفتكرهاش دلوقتي ..

اتخاصمنا مره لقتره وصلت لقرب اسبوع تقريبا واصحابنا كانو عارفين  .. ومحكتش لحد بعيد عننا خلافتنا.. مكنتش عارفه ان خصامنا ده حيبق الفتيل اللي حيتحط فيه اول شراره عشان تحاول تحرقنا  .. ومكنتش اعرف ان ده حيبقى اخر خلاف بيننا ..

كنت قاعده في البيت بليل يومها بعد المدرسه .. وجت ولاء اختى قالتلي

ولاء: الاء على التليفون عايزاكي يا نجوى

انا استغربت انها بتتصل واحنا متخاصمين ورحت رديت

نجوى: الو ايوه يا الاء ازيك

الاء: الحمد لله .. نجوى الحقي في حاجه غريبه حصلت 

انا اتخضيت وقتها من طريقه كلام الاء

نجوى: خير في ايه يا الاء

الاء: في واحده كلمتني دلوقتي .. فضلت تقولي عليكي كلام غريب قوي

نجوى:  واحده مين وبتقولك عليا ايه؟

الاء: ماعرفهاش .. فضلت تقولي خدي بالك منها ودي بتتكلم عليكي على طول وحش وبتشتمك وانت ازاي مصاحباها

انا حاولت اعصر مخي وقتها .. مين ممكن يبقى كلمها قالها كده .. حاولت افتكر اي حاجة عملتها شبه كده ومش فاكره اي حاجة .. بحاول الاقي اي سبب يخلي حد يقولها كده .. اي كلمه قلتها وتكون اتفهمت غلط .. فضلت افكر كتير وملقتش اي حاجة من دي خالص .. وكملت كلامي معاها

نجوى: لا انا مشتمتكيش خالص مبعرفش اشتم اساسا .. ولا اتكلمت عنك غير لميرنا ونجلاء لما اشتكيتلهم منك و ده كان قصادك كمان ؟ انا عمرى ماتكلم عنك وحش يا الاء ..

الاء: مانا عارفه و زعقت للبنت اللي كلمتني وقلتلها كده اساسا .. الغريب لما سألتها انت مين قالتلي انها واحده صاحبتك ماعرفهاش وقفلت السكه بعدها على طول

نجوى: غريبه قوي يعني مين حيعمل كده .. اكيد ده حد عايز يوقع بيننا؟

الاء: ماعرفش مين .. اكيد حد عارف اننا متخاصمين وبيوقع بيننا .. انا استغربت قوي وقلت لازم اكلمك لتكون بتكلم البنات تقولهم كده عليكي .. ممممم انت كان عندك صحاب في مدرستك القديمه وجيرانك ممكن حد فيهم بيعمل فيكي مقلب تقيل كده مثلا؟

نجوى: لا ولا جبت سيرتكم لحد وحيجيبو نمرتك منين اساسا 

حاولنا نفكر ف مين يبقى عمل كده موصلناش .. هيه كمان متعرفش صوت البنت اللي كلمتها ..

قفلت الاء وسابتني في حيره وهيه بردك كانت في حيره زيي .. حكيت لاهلي واستغربو قوي وقالولي اتاكد من باقي البنات ان محدش اتصل بيهم وقالهم كلام عليا .. اتصلت بيهم واتأكدت ان محدش كلمهم .. الغريب اللي عمل كده من غير مياخد باله صالحني مع الاء .. يعني بعدها رجعنا نتكلم ونتكلم كتير خصوصا عن الموضوع ده .. مفتكرش من يومها اتعاركنا تاني على حاجة اساسا .. مر كام يوم والوضع كان زي مهوه .. وانا الموضوع مش عايز بيطلع من بالي..

لغايه ميوم من الايام كنا في الفصل .. و قبل ماروح على طول وقافله شنطتي قررت افتحها .. مش فاكره السبب اللي خلاني افتحها دلوقتي .. بس فاكره لما فتحتها لفيت كتب وكراسات جواها بزياده .. فضلت ابص على الكتب والكراسات لقيت حاجات كتير جدا لياسمين في شنطتي .. طلعتها عشان اديهم لياسمين وانا مش عارفه حاقولها ايه .. انا ماعرفش ايه اللي حط كل ده في الشنطه .. اكيد ماتلغبطتش وخد كل دول بالغلط

طلعت الكتب ولفيت ورايا وحطيتهم على الديسك بتاعها

نجوى: ياسمين انا لقيت الحاجات دي في شنطتي معرفش دخلو ازاي

ياسمين والاء اللي قاعده جنبها بصو لبعض باستغراب قوي .. فاكره لغايه دلوقتي بعدها الاء قالتلي

الاء: انت كمان؟

بعدها ياسمين كملت

ياسمين: غريبه قوي نفس الموضوع حصل امبارح بس كانو مع الاء .. لما الاء روحت  بيتها امبارح لقت كتب وكراسات كتير من بتوعي في شنطتها واديتهوملي النهاردة الصبح

سكتنا احنا التلاته بس في بالنا نفس الحاجه .. اكيد دي مش صدفه

فضلت اراقب شنطتي طول الوقت من بعدها .. اشوف حد حيدخل حاجه او يطلع منها حاجه .. 

مر كام يوم وفي يوم روحت البيت كالعادة .. ماما كانت عامله سمك .. وكنا كلنا بنتغدى انا وماما وبابا واختي الكبيره .. رن تليفون البيت وكنا بناكل .. ادينا كلها زفاره من السمك و كان صعب نرد وقتها .. كان عندنا مجيب الي"انسر ماشين" قلنا بسيطه حنعرف مين بيتكلم وبعد منخلص اكل حنتصل بيه .. رد المجيب الالى .. و ..