مصير غريق 4

امير: هوه كل اللي بيجي هنا ولاد؟

ضحك اسعد ورد عليا : احنا مش عاجبينك ولا ايه؟

امير:لا اصل كان في بنت بتغرق معايا ودخلت نفس الدوامه معاها .. هيا موصلتش لهنا زيي؟

ضحكوا كلهم .. معرفش ايه ممكن يضحكهم من سؤالي ده .. ورد مجدي وفهمني كل حاجة ..

مجدي: احنا كلنا جينا بنفس الطريقه.. البحر كان هادي وبنت بتغرق.. تحاول تنقذها الجو يقلب فجأه .. ومتفهمش اي حاجه بتحصل لغايه متفتح عينك هنا..

اسعد:البنت دي زي النداهه اللي ندهتنا كلنا.. اكيد حاجه تبعهم هنا عشان يشدونا لعندهم..

امير: يعني محدش بييجي هنا غير لو الجو حلو عندنا؟

اسلام: ايوه عشان كده كل اللي حاولوا يطلعوا حاولوا في نفس يوم وصول حد جديد ..

وقتها بصولوا كلهم عشان يسكتوه.. وانا رديت بسرعه ..

امير: حاولوا يطلعوا؟

عمر: في مكان هنا لما توصله .. حتشوف ماية البحر من عندك بس من بعيد قوي  .. ممكن تنط منه لمايه البحر بس مش حتبقى عارف مصيرك .. تحس انك باصص من الدور العاشر.. في ناس نطت .. ومنعرفش مصيرها كان ايه.. عاشت اساسا بعد النطه ولا عرفت توصل للشط التاني اللي بيدخل منه المستجدين ..

امير: وبيحاولوا ليه يوصلوا للشط التاني؟

اسعد: اكتر مكان عليه حراسه هوه الشط التاني .. زي ميكونوا بيخافوا حد برجع منه.. مش بيشيلوا الحراسه من عليه غير وقت واحد بس .. لما ييجي مستجد وشهد تبقى بتفرجه على المكان.. و بعدها الحراسه بترجع..

عمر: يعني يا أمير لو كنت وصلت للشط امبارح قبل منهربك .. كنت حتشوف كميه الحراسه اللي عليه..

اسلام: امبارح كان في واحد مننا اسمه "محمد" حاول يستغل انهم شايلين الحراسة من الشط عشانك .. وحاول يروح الشط .. حاولنا نمنع محمد بس جرى وسابنا.. كنت انت تقريبا في المعبد يا أمير.. وانا راقبته من الغايه.. قبل ميوصل للشط في كائن منهم ضربوا بسهمين  .. ومات محمد ..

امير: واكلوه؟

بصلي اسلام باستغراب ورد: غريبة .. لا ماكلهوش.. في حارس راح المعبد ولما رجع حرقوه..

فكرت شوية وكملت ..

امير: ممم .. يبق هما مش بيكلو غير اللي طلب يتقتل.. انا افتكرت فعلا امبارح وانا في المعبد .. دخل كائن كده كلمهم واتبرجلوا كلهم.. بس شهد طبعا قالتلي كلام تاني خالص…

اسعد: انت متهور ولا لاء يا أمير؟

امير: تقصد ايه؟

اسعد:يعني حتجرب اي طريقه للرجوع حتى لو مش متأكد منها؟

امير: مظنش لازم ابقى مفكر فيها كويس ومنطقيه شويه.. ليه بتسأل

اسعد:كلهم هنا متهورين عايزين يرجعوا وخلاص..

دخل احمد وشريف بالفاكهه وبدأنا ناكل وكمل اسعد

اسعد:يعني اسلام مثلا كان طالع مع محمد امبارح عشان يروح معاه الشط مش عشان يمنعه.. واستنى الأول يشوف محمد ينزل البحر عشان يتطمن .. ولما اتقتل قصاده .. خاف ورجع..

وكمل اسعد: في طرق اوقات بنفكر فيها ومش عارفين مصيرها .. كلهم بيبقوا عايزين يجربوا وبتعب قوي عشان اقنعهم على الاقل واحد يجرب مش كلنا مع بعض..

اكلنا وقلت اطلع من الكهف .. قالولي لاء النهارده بنقلل طلوعنا.. بعد هروب واحد بيدوروا عليه في الغابه شويه..

كملنا اليوم كله في الكهف .. وهما بيحكولي عن الغابه واماكن الفاكهه والأعشاب..

امير: وكل قد ايه بييجي بشري جديد؟

شريف:اوقات بييجوا ورا بعض .. يعني كل ما واحد يتقل بعدها بيومين ييجي واحد جديد.. واوقات بالشهرين مبيجيش حد..

اسعد: تقريبا لما الجو بيبقى كويس بيجي ناس كتير ..

اسلام: احتمال كبير الدوامه اللي بتيجي فيها في زيها ترجعنا..

امير: يعني احنا بندور في الغابه على حاجه توصلنا الشط التاني او البحر اللي هناك؟  

اسلام: بالظبط كده..

بعدها بيوم صحيت بردك على الظهر.. زي قبلها بيوم بس مكنش عندي اسئله كتير زي الاول ..

اسعد: اعمل حسابك من بليل انت حتحرس معانا..

امير:تمام ماشي

يومها طلعنا من الكهف بعد مفطرنا بالفاكهه.. فرجوني على الغابه .. والحاجات اللي حكولي عنها.. لما وصلنا للمكان العالي عن البحر اللي حكولي عنه امبارح.. فضلنا واقفين نتفرج عل البحر واحنا بعيد..

اسعد: يا ترى اللي نطوا وصلوا .. ولا هما فين دلوقتي..

وقتها سمعت صوت الجرس لأول مره.. بيعلن عن قدوم بشري جديد.. غريق جديد مش عارف اللي مستنيه هنا..

فجأه .. لقينا عمر بينط في البحر .. بصيتلهم بذهول.. بس حاستهم عادي.. محدش اتفاجئ ولا اتأثر زيي ؟؟

امير: هوه نط فجأه ليه طيب

مجدي: متستغربش احنا اتعودنا على كده كل فتره حد يروح مننا يوم الجرس.. ومش عارفين بيوصل ولا لاء..

امير: بس ازاي من العلو ده.. تحت ممكن يخبط ف الصخر ويموت قبل ميوصل للبحر اساسا..

اسعد: كل مبتطول المده هنا بتيأس اكتر.. بتحاول بأي طريقه ..

مجدي: فعلا احنا آخر سته جينا هنا.. وكان معانا اسعد وعمر اقدم اتنين.. كل اللي في النص حاولو باي طريقه..

بصينا كلنا لاسعد..

و حاولت ابعده من الحرف عشان مينطش

امير:انت حتحاول تعمل زيهم؟

اسعد:للأسف مش حاعرف

رجعنا تاني الكهف.. وبليل مجدي وإسلام و شريف طلعوا يجيبوا البشري الجديد.. بس رجعوا بعد غياب لوحدهم..

مجدي: للأسف .. الجديد مطلعش من الكهف غير الصبح.. دخلت شهد الكهف وطلع معاها.. وراحوا المعبد .. شكله راح يطلب قتله ..

يومها بليل سمعنا صوت الجرسين..  ورحت مع احمد اشوف المنظر المريب اللي حكلنا عليه اسعد.. يمكن ماتأكدتش من كلامه غير لما شفت بعيني.. كان زي محكلنا بالظبط ..

بس بعدين .. حنفضل هنا محبوسين كده !!؟

(تستكمل)