مَرْكب

مَرْكِب .. انا مَرْكِب

في بحر واسع غويط

لا بخاف م الموج .. لحسن يغرقني ..

ولا م الهوا .. لحسن يطيرني ..

ولا م السفن .. لحسن تحاربني ..

بس بخاف م الناس .. لحسن تكسرني ..تدمرني ..

مَرْكِب .. انا مَرْكِب

بحس بكده كل مابقى نايم بظهري .. عالسرير ..

بحس اني عايم .. و شايل حِمل من الناس تقيل ..

مخلوق مخنوق و حاسس إني بغرق ..

عايز أصرخ بس مش قادر انطق..

عايز أنزِّلهم بس خايف أزعَّلهم ..

بتقلّب اقول يخافو .. لكن هما مكملين ..

مكملين جوه مَرْكِب مش عارفه رايحة فين ..

مكملين جوه مَرْكِب ماشية من غير شراع ..

حسّين بالأمان .. وانا اللي جوايا مليون صراع ..

مَرْكِب .. انا مَرْكِب

مَرْكِب تايهه في بحر السراب

لا السراب موجود

ولا البحر بيجود

فضلت تايهه في طريقها

محدش عايز يفيدها

ولا حد عايز يسيبها

مَرْكِب .. انا مَرْكِب

مَرْكِب من غير قبطان

من غير أمان

من غير جهه .. ولا عنوان

بس ليها شكل انسان

وهوه في الاصل

مَرْكِب ..

انا مَرْكِب